பித்ரு தோஷத்தைப் போக்க சிறந்த நாளான ஆடி அமாவாசை அன்று முன்னோர்களை வணங்குவது சிறப்பம்சமாகும். இந்த புனித நாளில் முன்னோர்களை வழிபடுவதன் மூலம், திருமணம், குழந்தைப்பேறு போன்ற தாமதமான சுப காரியங்கள் தடையின்றி நடைபெறும் என்றும், முன்னோர்களின் முழுமையான ஆசீர்வாதம் கிடைக்கும் என்றும் நம்பப்படுகிறது. ஜாபாலி மகரிஷி கூறியதன் படி, முன்னோர்களை சிறந்த முறையில், சிரத்தையுடன் வழிபட்டால் நீண்ட ஆயுள், நல்ல வாரிசுகள், புகழ், செல்வம், நிறைந்த தானியங்கள் உள்ளிட்ட பதினாறு பேறுகளையும் பெற்று வாழலாம்.
'ஓடிப்போனவனுக்கு ஆடி அமாவாசை, தடுமாறிப்போனவனுக்குத் தை அமாவாசை, மறந்துபோனவனுக்கு மஹாளய அமாவாசை' என்றொரு பழமொழியும் உண்டு. அதன்படி, மறக்க முடியாத மற்றும் மறக்கப்பட்ட முன்னோர்களை வணங்கி, அவர்களை மகிழ்விக்க எள்ளும் நீரும் தந்து பூஜை செய்து, வறியவர்களுக்கு அன்னதானம் அளிப்பது அவசியம். இது எடுத்த ஜென்மம் கடைத்தேற உதவும்.
காஞ்சி பரமாசாரியாரின் விளக்கத்தின்படி, நாம் அளிக்கும் பொருள், பித்ரு தேவதைகளால் முன்னோர்களுக்குப் பிரியமான உணவாக மாற்றப்பட்டு, அவர்களுக்குச் சென்றடைகிறது. பித்ரு உலகில் உலவும் நம் மூதாதையர்கள், தர்மராஜனின் அனுமதியுடன் ஆடி அமாவாசையன்று பூமிக்குத் திரும்பி வருவதாகவும், புரட்டாசி மாத மஹாளய அமாவாசை வரை நம்முடன் மானசீகமாக இருப்பதாகவும் கூறப்படுகிறது. தை அமாவாசை அன்று அவர்கள் நம்மை ஆசிர்வதித்துவிட்டு மீண்டும் பித்ரு உலகிற்குச் செல்வதாக ஐதிகம்.
எனவே, ஆடி, புரட்டாசி, தை அமாவாசை ஆகிய மூன்று நாட்களிலும் முறையாகத் திதி கொடுத்து முன்னோரை மகிழ்வித்தால், 21 தலைமுறைகளாகத் தொடரும் சகல தோஷங்களும் நீங்கி நன்மை பயக்கும் என்பது அசைக்க முடியாத நம்பிக்கை. பகவான் கிருஷ்ணர், 'தாய், தந்தையருக்கு சிரார்த்தம் செய்யாமல் தனக்கு மட்டும் செய்யும் பூஜைகளை நான் ஏற்றுக்கொள்வதில்லை' என்று கூறியுள்ளார். எனவே, பித்ரு தர்ப்பணம் மிகவும் முக்கியமானது. தாய், தந்தையரின் இறந்த தேதி அல்லது திதி தெரியாதவர்கள், ஆடி, புரட்டாசி, தை அமாவாசையன்று திதி கொடுக்கலாம். இதற்கு 'முன்னோருக்கு மூன்று கை தண்ணீர்' என்ற வட்டார வழக்கும் உண்டு.
நீதி நூல்களின்படி, புடலங்காய் பித்ருலோகத்தில் மூலிகையாக உள்ளது. அதன் நிழலில்தான் நம் முன்னோர் இளைப்பாறுகின்றனர். எனவே, ஆடி அமாவாசை அன்று புடலங்காய், வாழைக்காய், வாழைத்தண்டு ஆகியவற்றை படையலில் சேர்ப்பதால், வாழையடி வாழையாகக் குலம் தழைக்க முன்னோர்கள் ஆசி வழங்குவார்கள். பசுந்தயிரும் அவர்களுக்குப் பிடித்தமான உணவு என்பதால், அதையும் சேர்ப்பது நல்லது.
பொதுவாக, இச்சையைத் தூண்டும் வெங்காயம், பூண்டு, முருங்கைக்காய், கத்திரிக்காய் போன்ற காய்கறிகளை அன்றைய தினம் தவிர்க்க வேண்டும். படையலை காகத்திற்கு வைத்து, காகம் உண்ட பிறகே நாம் உண்ண வேண்டும். நம் முன்னோர்தான் காகம் வடிவில் பூமிக்கு வருவதாக ஐதிகம். காகம் எமனின் தூதுவன் என்றும், எமலோகத்தின் வாயிலில் காவல் காக்கிறது என்றும் கூறப்படுகிறது. காகத்திற்கு சாதம் வைத்து, அது கொத்தி உண்டால், எமலோகத்தில் வாழும் நம் முன்னோர் அமைதியடைந்து நமக்கு ஆசி வழங்குவார்கள்.
மூதாதையர்கள் பிதுர்லோகம் திரும்புவதால், அவர்களின் பயணம் சீராக அமைய, அரிசி, பாசிப்பருப்பு, நெய், வாழைக்காய், குடை, காலணி போன்றவற்றை முன்னோரின் பிரதிநிதியாகப் பங்குபெறும் அந்தணர்களுக்கு அளிக்க வேண்டும். காசி, பிரயாக்ராஜ் திரிவேணி சங்கமம், கயா, ராமேஸ்வரம், கன்னியாகுமரி, பவானி கூடுதுறை, கொடுமுடி, பேரூர், திருவையாறு, ஸ்ரீவாஞ்சியம், திருவெண்காடு 'திலதைப்பதி' ஆகியவை ஆடி அமாவாசை அன்று முன்னோரை வழிபட சிறந்த தலங்களாகும். ஆடி அமாவாசையன்று வீட்டு வாசலில் கோலமிடக்கூடாது. பித்ரு பூஜை முடியும் வரை, வீட்டில் அன்றாடம் செய்யும் பூஜைகளைத் தவிர்க்க வேண்டும்.
