வரலாற்றுச் சிறப்புமிக்க சென்னை சர்வதேச விமான நிலையத்தின் தற்போதைய இந்திய விமான நிலையங்கள் ஆணையத்தின் (AAI) நிர்வாகத்தை மாற்றி, வேறு ஒரு தனியார் நிறுவனத்திடம் ஒப்படைக்க வேண்டும் என்று முதல்வர் ஜோசப் விஜய், பிரதமருக்கு கடிதம் எழுதியுள்ளதாக வெளியான செய்திகளுக்கு, பாஜக தேசிய மகளிரணி முன்னாள் தலைவர் வானதி சீனிவாசன் கடும் கண்டனம் தெரிவித்துள்ளார். பொதுத்துறை நிறுவனங்களை தனியாருக்கு தாரை வார்க்க தமிழக அரசு முயற்சிக்கிறதா என்ற சந்தேகம் எழுகிறது என அவர் தனது எக்ஸ் தள பதிவில் குறிப்பிட்டுள்ளார்.
சென்னை விமான நிலையம், 2024-25 நிதியாண்டின் அறிக்கையின்படி, 2.24 கோடிக்கும் அதிகமான பயணிகளைக் கையாண்டு, லாபகரமாக இயங்கி வருவதாகவும், தென்னிந்தியாவின் முக்கிய சரக்கு போக்குவரத்து மையமாகவும் திகழ்வதாகவும் வானதி சீனிவாசன் சுட்டிக்காட்டினார். மேலும், விமான நிலைய விரிவாக்கம் மற்றும் நவீனமயமாக்கலுக்காக இந்திய விமான நிலையங்கள் ஆணையம் (AAI) ரூ. 2,467 கோடி நிதியில் வளர்ச்சித் திட்டத்தையும் மேற்கொண்டு வருவதாக அவர் தெரிவித்தார்.
இப்படி தொடர்ச்சியாக வருவாய் ஈட்டுவதிலும், சரக்குகள் மற்றும் பயணிகளைக் கையாள்வதிலும் சிறந்து விளங்கும் இந்திய விமான நிலையங்கள் ஆணையத்தின் (AAI) நிர்வாகத்தை மாற்ற வேண்டிய அவசியம் தமிழக அரசுக்கு என்ன என்றும் அவர் கேள்வி எழுப்பினார். இதுகுறித்து முதல்வர் தரப்பிலிருந்து மக்களுக்கு தெளிவான விளக்கம் அளிக்க வேண்டியது அரசின் கடமை என்றும் அவர் வலியுறுத்தினார்.
மேலும், கடந்த ஆகஸ்ட் மாதம் எழுதப்பட்ட கடிதம் தற்போது வெளிவந்திருப்பதன் காலதாமதத்திற்கான காரணத்தையும் அவர் கேள்விக்குள்ளாக்கினார். ஏற்கனவே பரந்தூர் விமான நிலைய திட்டத்தை ரத்து செய்துவிட்டு, தமிழகத்தை 10 ஆண்டுகள் பின்னோக்கித் தள்ளிய தவெக அரசு, தற்போது பொதுத்துறை நிறுவனங்கள் மீதும் கைவைத்திருப்பது, இந்த அரசு உண்மையாகவே மக்களுக்கான அரசாக செயல்படுகிறதா என்ற சந்தேகத்தையே எழுப்புகிறது என வானதி சீனிவாசன் தனது கண்டனத்தைப் பதிவு செய்தார்.
சென்னை விமான நிலையத்தின் எதிர்காலம் தொடர்பான எந்தவொரு முடிவும், பயணிகள் நலன், ஊழியர்கள் நலன், பொதுத்துறை முதலீடுகளின் பாதுகாப்பு மற்றும் வெளிப்படைத்தன்மை ஆகியவற்றை உறுதி செய்த பின்னரே எடுக்கப்பட வேண்டும் என்றும் அவர் வலியுறுத்தினார். முதல்வர் விஜய் அனுப்பிய இந்தக் கடிதத்தை உடனடியாக வாபஸ் பெற வேண்டும் என்றும் வானதி சீனிவாசன் கேட்டுக்கொண்டார். இந்த விவகாரம் தமிழக அரசியல் வட்டாரத்தில் பெரும் விவாதத்தை ஏற்படுத்தியுள்ளது.
