மத்திய கிழக்கில் நிலவும் பதற்றமான சூழல் காரணமாக ஹார்முஸ் நீரிணையில் கப்பல் போக்குவரத்து பாதிக்கப்பட்டு, இந்தியாவின் எரிபொருள் கையிருப்பு கணிசமாகக் குறைந்திருந்த நிலையில், தற்போது ஒரு முக்கிய செய்தி வெளியாகியுள்ளது. கடந்த 13-ஆம் தேதி, 66,392 டன் சமையல் எரிவாயுவுடன் இந்தியாவை நோக்கிப் புறப்பட்ட இரண்டு இந்திய கப்பல்கள், ஹார்முஸ் நீரிணையை வெற்றிகரமாகக் கடந்து வந்துள்ளன.
மார்ஷல் தீவுகள் கொடியுடன் வந்த 'சிமி' என்ற கப்பல், நேற்று குஜராத் மாநிலம் கட்ச் மாவட்டத்தில் உள்ள காண்ட்லா தீன்தயாள் துறைமுகத்தை வந்தடைந்தது. இந்த கப்பல் 20,000 டன் சமையல் எரிவாயுவை ஏற்றி வந்துள்ளது. இக்கப்பலில் 8 உக்ரேனியர்கள் மற்றும் 13 பிலிப்பைன்ஸ் நாட்டினர் என மொத்தம் 21 பேர் கொண்ட குழுவினர் இருந்தனர்.
மற்றொரு கப்பலான 'என்.வி.சன்ஷைன்', வியட்நாம் கொடியுடன் 46,000 டன் சமையல் எரிவாயுவை ஏற்றி வந்துள்ளது. இது இன்று (திங்கட்கிழமை) கர்நாடக மாநிலம் புது மங்களூரு துறைமுகத்தை வந்தடையும் என எதிர்பார்க்கப்படுகிறது. இந்த கப்பல் போக்குவரத்து, இந்தியாவின் கச்சா எண்ணெய் கையிருப்பு 18 நாட்களுக்கு மட்டுமே உள்ளதாக வெளியான தகவல்களுக்கு மத்தியில் பெரும் ஆறுதலை அளித்துள்ளது.
கடந்த இரண்டு மாதங்களில் மட்டும் 15 கப்பல்கள் ஹார்முஸ் நீரிணையை கடந்து இந்தியாவை வந்தடைந்துள்ளன. இது, மத்திய கிழக்கில் நிலவும் சவால்களுக்கு மத்தியிலும், இந்தியாவிற்கான விநியோகத் தடைகள் நீங்கத் தொடங்கியுள்ளதைக் காட்டுகிறது. மேலும், சமீபத்தில் நடந்த பிரிக்ஸ் மாநாட்டில், இந்திய கப்பல்கள் ஹார்முஸ் நீரிணையை கடக்க உதவுவதாக ஈரான் வெளியுறவுத்துறை அமைச்சர் அப்பாஸ் அராக்சி உறுதியளித்ததும் குறிப்பிடத்தக்கது.
