மதுரை மீனாட்சி சுந்தரேசுவரர் திருக்கோவில் குடமுழுக்கு விழா நேற்று வெகுவிமரிசையாக நடைபெற்றது. சுமார் 17 ஆண்டுகளுக்குப் பிறகு நடைபெற்ற இந்த மாபெரும் விழாவைக் காண தமிழகம் மட்டுமின்றி பல்வேறு மாநிலங்களில் இருந்தும் ஆயிரக்கணக்கான பக்தர்கள் மதுரையை நோக்கி குவிந்தனர்.
வெயில் மற்றும் கூட்ட நெரிசலுக்கு மத்தியில் நீண்ட நேரம் காத்திருந்து குடமுழுக்கு விழாவைக் காண வந்த பக்தர்களுக்கு பல்வேறு அமைப்புகள், பொதுமக்கள் மற்றும் தன்னார்வலர்கள் சார்பில் குடிநீர் உள்ளிட்ட உதவிகள் வழங்கப்பட்டன. இந்த சூழலில், மதுரை தெற்குவாசல் பகுதியில் நடைபெற்ற ஒரு நிகழ்வு அனைவரின் கவனத்தையும் ஈர்த்துள்ளது.
மதுரை புறநகர் மற்றும் பிற பகுதிகளில் இருந்து மீனாட்சியம்மன் கோவில் குடமுழுக்கு விழாவைக் காண வந்த பக்தர்களுக்கு, அப்பகுதியைச் சேர்ந்த இஸ்லாமியர்கள் மதம் கடந்து அன்புடன் உபசரித்து உதவினர். இது அனைவரையும் நெகிழச் செய்தது.
பக்தர்களின் தாகத்தைத் தணிக்கும் வகையில், இஸ்லாமியர்கள் குடிநீர் பாட்டில்கள், மோர், குளிர்பானங்கள், ரோஸ் மில்க் உள்ளிட்ட பல்வேறு பானங்களை ஆர்வத்துடன் வழங்கினர். கோவிலை நோக்கி நடந்து சென்ற பக்தர்களை அன்புடன் அழைத்து, 'தண்ணீர் குடித்துச் செல்லுங்கள்', 'மோர் வாங்கிக்கொள்ளுங்கள்' எனக் கூறி உற்சாகத்துடன் பானங்களை வழங்கினர்.
வெயிலையும் பொருட்படுத்தாமல், தொடர்ந்து பக்தர்களுக்கு இஸ்லாமியர்கள் பானங்களை வழங்கிய காட்சி, இந்து பக்தர்களிடையே பெரும் நெகிழ்ச்சியையும், நெகிழ்வான உணர்வுகளையும் ஏற்படுத்தியது. இந்த செயல், மத நல்லிணக்கத்தின் சிறந்த உதாரணமாகப் போற்றப்பட்டது.
இந்த குடமுழுக்கு விழாவிற்கு வந்திருந்த பக்தர்கள், இஸ்லாமியர்களின் இந்த அன்பான உபசரிப்பைப் பாராட்டி நெகிழ்ந்தனர். இது போன்ற மனிதநேயமிக்க செயல்கள் சமூகத்தில் நல்லிணக்கத்தை வளர்ப்பதோடு, அனைவரையும் அன்புடன் அரவணைக்கும் மதுரையின் பெருமையை மேலும் உயர்த்திக் காட்டுவதாகவும் அமைந்தது.
மீனாட்சி அம்மன் குடமுழுக்கு விழாவிற்கு வந்திருந்த ஆயிரக்கணக்கான பக்தர்களின் தாகத்தை தணித்த இஸ்லாமியர்களின் இந்த செயல், மத வேறுபாடின்றி அனைவரும் ஒருவருக்கொருவர் உதவிக்கொண்டு வாழும் உன்னத பண்பை எடுத்துக்காட்டியது. இது போன்ற நிகழ்வுகள் சமூகத்தில் மேலும் பரவ வேண்டும் என பலரும் கருத்து தெரிவித்தனர்.
