நீர்வளத்துறை டெண்டர் முறைகேடு: அமைச்சர் ஆனந்த் தலையீடு சர்ச்சை?

வடகிழக்கு பருவமழை முன்னெச்சரிக்கை நடவடிக்கையாக, சென்னை, திருவள்ளூர், காஞ்சிபுரம், செங்கல்பட்டு மாவட்டங்களில் உள்ள ஏரிகள் மற்றும் கால்வாய்களை தூர்வாரும் பணிகளுக்காக 42 கோடி ரூபாய் நிதி ஒதுக்கீடு செய்யப்பட்டு, நீர்வளத்துறை சார்பில் டெண்டர் கோரப்பட்டது. இந்த டெண்டர் விவகாரத்தில் முறைகேடு நடந்திருப்பதாகவும், இதில் அமைச்சர் ஆனந்தின் தலையீடு இருப்பதாகவும் குற்றச்சாட்டுகள் எழுந்துள்ளன.

குறிப்பாக, திருவள்ளூர் மாவட்ட நீர்வளத்துறை செயற்பொறியாளர் ராதாகிருஷ்ணன், குறைந்த ஒப்பந்தப்புள்ளியை கோரிய அஜய் பில்டர்ஸ் நிறுவனத்திற்கு டெண்டர் வழங்காமல், அதற்கு அடுத்த நிலையில் உள்ள ஒப்பந்தப்புள்ளியை கோரிய நிறுவனத்திற்கு டெண்டரை வழங்கியுள்ளார். இது நீர்வளத்துறையில் பெரும் சர்ச்சையை ஏற்படுத்தியுள்ளது.

அடையாறு முகத்துவாரத்தை தூர்வாரும் பணிக்கு, அஜய் பில்டர்ஸ் நிறுவனம் -6.0% என்ற குறைந்த ஒப்பந்தப்புள்ளியை கோரியிருந்தது. ஆனால், வெங்கடேஷ் பாபு என்பவர் -1.90% என்ற ஒப்பந்தப்புள்ளியை கோரியிருந்தார். இதேபோல், மற்றொரு பணிக்கு அஜய் பில்டர்ஸ் நிறுவனம் -6.0% ஆகவும், வெங்கடேஷ் பாபு நிறுவனம் -4.90% ஆகவும் ஒப்பந்தப்புள்ளிகளை கோரியிருந்தன.

இருப்பினும், இரண்டு டெண்டர்களையும் வெங்கடேஷ் பாபு நிறுவனத்திற்கே செயற்பொறியாளர் ராதாகிருஷ்ணன் தேர்வு செய்து ஒப்படைத்துள்ளார். பொதுவாக, குறைந்த ஒப்பந்தப்புள்ளியை கோரிய நிறுவனத்திற்கே டெண்டர் வழங்கப்படும் என்ற நிலையில், செயற்பொறியாளர் தனக்கு வேண்டிய ஒப்பந்த நிறுவனத்திற்கு டெண்டரை வழங்கியதாக கூறப்படுகிறது.

இதற்கு முன்னர், தாம்பரம் மாநகராட்சியில் ஏற்கனவே முடிக்கப்பட்ட பணிகளுக்கு மீண்டும் டெண்டர் விட்டதாக வெளியான குற்றச்சாட்டைத் தொடர்ந்து, சம்பந்தப்பட்ட ஆணையர் பணியிட மாற்றம் செய்யப்பட்டு காத்திருப்போர் பட்டியலில் வைக்கப்பட்டார். மேலும், ஒரு உதவி செயற்பொறியாளர் பணியிடை நீக்கம் செய்யப்பட்டார். ஆனால், நீர்வளத்துறையில் டெண்டர் முறைகேட்டில் ஈடுபட்டதாக கூறப்படும் செயற்பொறியாளர் மீது இதுவரை எந்த நடவடிக்கையும் எடுக்கப்படவில்லை.

தனக்கு வேண்டிய நிறுவனத்திற்காக டெண்டர் விட்ட அதிகாரியை பணியிட மாற்றம் கூட செய்யாமல் அரசு தயக்கம் காட்டுவதாக நேர்மையான பொறியாளர்கள் வேதனையுடன் தெரிவித்துள்ளனர். நீர்வளத்துறை அமைச்சர் ஆனந்த்துக்கு மிகவும் நெருக்கமான அதிகாரியாக இவர் இருப்பதால், அவர் மீது நடவடிக்கை எடுக்க அரசு தயக்கம் காட்டுவதாகவும் கூறப்படுகிறது.

இந்த டெண்டர் முறைகேடு விவகாரம், நீர்வளத்துறையில் பெரும் அதிர்வலைகளை ஏற்படுத்தியுள்ளதுடன், வெளிப்படைத்தன்மை கேள்விக்குறியாக்கப்பட்டுள்ளதாக பல்வேறு தரப்பினரும் கருத்து தெரிவித்துள்ளனர். இது குறித்து உரிய விசாரணை நடத்தப்பட வேண்டும் என்ற கோரிக்கையும் வலுத்துள்ளது.

Author

Fernandez

Senior Reporter

Fernandaz – MDTV 24x7 News நிறுவனத்தின் Senior Reporter மற்றும் General News Writer ஆக பணியாற்றி வருகிறார். அரசியல், சமூக நிகழ்வுகள், மக்கள் பிரச்சினைகள் மற்றும் முக்கிய நடப்பு செய்திகளை துல்லியமாகவும் விரைவாகவும் மக்களிடம் கொண்டு சேர்ப்பதில் அனுபவம் பெற்றவர். நம்பகமான தகவல்களை தரமான செய்திகளாக வழங்கும் நோக்கத்துடன் செய்தித்துறையில் தொடர்ந்து செயல்பட்டு வருகிறார்.