லண்டன் மாநகரில் முதலமைச்சர் ஜோசப் விஜய்யின் நிகழ்ச்சி திடீரென ரத்து செய்யப்பட்டதால் ரசிகர்கள் பெரும் ஏமாற்றமடைந்தனர். தேம்ஸ் நதிக்கரை ஓட்டல் ஒன்றில் தங்கியிருந்த முதலமைச்சர் விஜய்யைச் சந்திக்க அவரது ரசிகர்கள் திரளானோர் ஓட்டல் எதிரே கூடினர். 'TVK TVK' என கோஷமிட்டு தங்கள் ஆதரவை வெளிப்படுத்தினர்.
முதலமைச்சர் விஜய் தங்கியிருந்த ஓட்டல் அருகே லண்டன் பிரிட்ஜ் ரயில் நிலையம் மற்றும் முக்கிய மருத்துவமனை அமைந்துள்ளது. இதனால், பொதுமக்களின் இயல்பான போக்குவரத்து பாதிக்கப்பட்டது. இதனைக் கருத்தில் கொண்டு, கலைந்து செல்லுமாறு லண்டன் காவல்துறையினர் ஒலிபெருக்கி மூலம் ரசிகர்களுக்கு அறிவுறுத்தினர்.
முதலமைச்சருடன் சென்ற பாதுகாப்பு அதிகாரியான தர்மராஜ் ஐபிஎஸ்ஸும், லண்டன் போலீசாருடன் இணைந்து, 'அனுமதி மறுக்கப்பட்டதால் அனைவரும் கலைந்து செல்ல வேண்டும்' என வேண்டுகோள் விடுத்தார்.
இந்தச் சூழலில், தவெக தரப்பிலிருந்து ஒரு வேண்டுகோள் விடுக்கப்பட்டது. அதில், 'தமிழ்நாடு முதலமைச்சர் ஜோசப் விஜய்யைக் காண லண்டன் மாநகர தமிழ் உறவுகள் மிகுந்த ஆர்வத்துடன் இருப்பீர்கள் என்பதை நாங்கள் அறிவோம். இருப்பினும், பொதுமக்களின் பாதுகாப்பைக் கருத்தில் கொண்டும், லண்டன் மாநகர காவல்துறையின் வேண்டுகோளை ஏற்றுக்கொண்டும், முதலமைச்சரை நேரில் காண இயலாத சூழல் ஏற்பட்டுள்ளது. எனவே, அவரைச் சந்திக்க யாரும் முயற்சிக்க வேண்டாம் என அன்புடன் கேட்டுக்கொள்கிறோம்' என்று தெரிவிக்கப்பட்டது.
மேலும், முதலமைச்சர் தங்கியிருக்கும் ஓட்டல் வாசலிலோ அல்லது அவர் செல்லும் வழியிலோ காத்திருக்கும் முயற்சிகளை மேற்கொள்ள வேண்டாம் என்றும் தவெக தரப்பில் பணிவன்புடன் கேட்டுக்கொள்ளப்பட்டுள்ளது. இந்த திடீர் ரத்து ரசிகர்களிடையே சோகத்தை ஏற்படுத்தியுள்ளது.
