நடிகர் விஜய் சேதுபதிக்கு தவெக எம்எல்ஏ சுகுமார் மிரட்டல்

நடிகர் விஜய் சேதுபதிக்கு தவெக எம்எல்ஏ சுகுமார் மிரட்டல் விடுத்துள்ளார். சமீபத்தில் பிக்பாஸ் நிகழ்ச்சியில் தலைமை குறித்து நடிகர் விஜய் சேதுபதி பேசியது வைரலாகி வரும் நிலையில், இந்த விவகாரம் தற்போது பெரும் சர்ச்சையை கிளப்பியுள்ளது. குறிப்பாக, சூலூர் தொகுதி தவெக எம்எல்ஏ சுகுமார், நடிகர் விஜய் சேதுபதிக்கு பகிரங்கமாக மிரட்டல் விடுத்துள்ளார்.

விஜய் சேதுபதி செல்லும் இடங்களில் எல்லாம் அவரை முற்றுகையிடுவோம் என்றும், அவர் உடனடியாக பகிரங்க மன்னிப்பு கேட்க வேண்டும் என்றும் எம்எல்ஏ சுகுமார் வலியுறுத்தியுள்ளார். இது தொடர்பாக எம்எல்ஏ சுகுமார் கூறுகையில், 'முதல்வர் விஜயைப் பற்றி பேசுவதற்கு நடிகர் விஜய் சேதுபதிக்கு எந்தத் தகுதியும் இல்லை. பிக்பாஸ் நிகழ்ச்சியின் விளம்பரத்திற்காகவே விஜய் சேதுபதி இப்படிப் பேசுகிறார். ஏனெனில், தற்போதைய சூழலில் யாரும் நாடகங்களையோ, பிக்பாஸ் நிகழ்ச்சிகளையோ பார்ப்பதில்லை. அனைவரும் சட்டமன்ற நிகழ்வுகளைத்தான் உன்னிப்பாகக் கவனித்து வருகின்றனர். ஒருவேளை, தனது மார்க்கெட் சரிந்துவிட்டதால், நடிகர் விஜய் சேதுபதி முதல்வர் விஜய் குறித்து இவ்வாறு பேசியிருக்கலாம்' என்று தெரிவித்தார். இந்த மிரட்டல் சம்பவம் தற்போது திரைத்துறையினர் மற்றும் அரசியல் வட்டாரங்களில் பரபரப்பை ஏற்படுத்தியுள்ளது.

Author

Fernandez

Senior Reporter

Fernandaz – MDTV 24x7 News நிறுவனத்தின் Senior Reporter மற்றும் General News Writer ஆக பணியாற்றி வருகிறார். அரசியல், சமூக நிகழ்வுகள், மக்கள் பிரச்சினைகள் மற்றும் முக்கிய நடப்பு செய்திகளை துல்லியமாகவும் விரைவாகவும் மக்களிடம் கொண்டு சேர்ப்பதில் அனுபவம் பெற்றவர். நம்பகமான தகவல்களை தரமான செய்திகளாக வழங்கும் நோக்கத்துடன் செய்தித்துறையில் தொடர்ந்து செயல்பட்டு வருகிறார்.