மத்திய பணியாளர் தேர்வு ஆணையம் (SSC) ஆனது, மத்திய அரசுப் பணிகளில் கிளார்க் மற்றும் டேட்டா என்ட்ரி ஆபரேட்டர் போன்ற பல்வேறு பதவிகளுக்கு 2,536 காலிப்பணியிடங்களை நிரப்புவதற்கான அறிவிப்பை வெளியிட்டுள்ளது. இந்த வேலைவாய்ப்பு 2026 ஆம் ஆண்டிற்கான SSC CHSL (Combined Higher Secondary Level) தேர்வின் கீழ் அறிவிக்கப்பட்டுள்ளது. தகுதியும் விருப்பமும் உள்ளவர்கள் ஆன்லைன் மூலம் விண்ணப்பிக்கலாம்.
இந்த ஆட்சேர்ப்பு மூலம், கீழ்நிலை எழுத்தர் (Lower Division Clerk – LDC)/ இளநிலை செயலக உதவியாளர் (Junior Secretariat Assistant – JSA), தரவு உள்ளீட்டு ஆபரேட்டர் (Data Entry Operator – DEO), மற்றும் தரவு உள்ளீட்டு ஆபரேட்டர் கிரேடு ‘A’ (Data Entry Operator Grade ‘A’) ஆகிய பதவிகள் நிரப்பப்பட உள்ளன. மொத்தம் 2,536 காலிப்பணியிடங்கள் அறிவிக்கப்பட்டுள்ளன. இந்தப் பணிகளுக்கான சம்பள வரம்பு, பதவியின் வகையைப் பொறுத்து மாதத்திற்கு ₹19,900 முதல் ₹63,200 வரை இருக்கும்.
கல்வித் தகுதியைப் பொறுத்தவரை, LDC/JSA பதவிக்கு அங்கீகரிக்கப்பட்ட கல்வி வாரியம் அல்லது பல்கலைக்கழகத்தில் இருந்து 12 ஆம் வகுப்பு தேர்ச்சி பெற்றிருக்க வேண்டும். DEO மற்றும் DEO கிரேடு ‘A’ பதவிகளுக்கு, அறிவியல் பிரிவில் கணிதத்துடன் 12 ஆம் வகுப்பு தேர்ச்சி பெற்றிருக்க வேண்டும் அல்லது அதற்கு இணையான தகுதியைப் பெற்றிருக்க வேண்டும்.
வயது வரம்பைப் பொறுத்தவரை, விண்ணப்பதாரர்கள் 07.10.2026 நிலவரப்படி குறைந்தபட்சம் 18 வயது பூர்த்தி அடைந்தவராகவும், அதிகபட்சம் 27 வயதுக்கு உட்பட்டவராகவும் இருக்க வேண்டும். அதாவது, 02-08-1999 முதல் 01-08-2008 க்கு இடையில் பிறந்திருக்க வேண்டும். அரசு விதிமுறைகளின்படி SC/ST பிரிவினருக்கு 5 ஆண்டுகளும், OBC பிரிவினருக்கு 3 ஆண்டுகளும் வயது வரம்பில் தளர்வு உண்டு.
சம்பள விவரங்கள்: LDC/JSA பதவிக்கு மாத சம்பளம் ₹19,900 – ₹63,200 ஆகவும், DEO பதவிக்கு ₹29,200 – ₹92,300 ஆகவும், DEO கிரேடு ‘A’ பதவிக்கு ₹25,500 – ₹81,100 ஆகவும் நிர்ணயிக்கப்பட்டுள்ளது.
தேர்வு செயல்முறையானது Tier-I மற்றும் Tier-II கணினி வழித் தேர்வுகள் மற்றும் ஆவண சரிபார்ப்பு ஆகியவற்றை உள்ளடக்கியது. தமிழ்நாட்டில் சென்னை, கோவை, மதுரை, சேலம், திருச்சி, நெல்லை, வேலூர், கிருஷ்ணகிரி ஆகிய நகரங்களில் தேர்வு மையங்கள் அமைக்கப்பட்டுள்ளன.
விண்ணப்பக் கட்டணம்: பெண்கள், SC/ST, முன்னாள் ராணுவத்தினர் மற்றும் மாற்றுத்திறனாளிகளுக்கு கட்டணம் இல்லை. மற்ற அனைத்து விண்ணப்பதாரர்களுக்கும் விண்ணப்பக் கட்டணமாக ரூ.100/- நிர்ணயிக்கப்பட்டுள்ளது. இதனை இணையவழி மூலம் செலுத்த வேண்டும்.
ஆன்லைனில் விண்ணப்பிக்கத் தொடங்கும் நாள் 07.09.2026 ஆகும். விண்ணப்பிக்க கடைசி நாள் 07.10.2026. விண்ணப்பத் திருத்தங்களுக்கான கால அவகாசம் 14.10.2026 முதல் 16.10.2026 வரை வழங்கப்படும். தேர்வு நடைபெறும் தேதி பின்னர் அறிவிக்கப்படும். தகுதியான விண்ணப்பதாரர்கள் ஸ்டாப் செலக்ஷன் கமிஷன் அதிகாரப்பூர்வ இணையதளமான https://ssc.gov.in/ இல் விண்ணப்பிக்கலாம்.
