ரசிகர்களின் மனம் கவர்ந்த நட்சத்திரங்கள் போஸ் வெங்கட் மற்றும் காயத்ரி நடிப்பில் உருவாகியுள்ள புதிய வெப் தொடர் ‘பிரதர்ஸ் அண்ட் சிஸ்டர்ஸ்’. இந்தத் தொடர் மே 27 ஆம் தேதி முதல் ஜியோ ஹாட்ஸ்டார் தளத்தில் ஒளிபரப்பாக உள்ளது.
ராஜ் அய்யப்பன், நிகிலா சங்கர், லூதுஃப், கிஷோர், ஷ்ரவ்னிதா, புரமோதினி உள்ளிட்ட பல முன்னணி நட்சத்திரங்களும் இந்த வெப் தொடரில் நடித்துள்ளனர். ‘உப்பு புளி காரம்’, ‘போலீஸ் போலீஸ்’ போன்ற வெற்றித் தொடர்களை இயக்கிய சிதம்பரம் மணிவண்ணன் இந்த ‘பிரதர்ஸ் அண்ட் சிஸ்டர்ஸ்’ வெப் தொடரை இயக்கியுள்ளார்.
ஜவுளி வியாபாரம் செய்யும் ஒரு தொழிலதிபரின் குடும்பப் பின்னணியை மையமாக வைத்து, நான்கு உடன் பிறந்தவர்களின் உறவுச் சிக்கல்களையும், அதன் சுவாரஸ்யங்களையும் இந்தத் தொடர் அழகாக சித்தரிக்கிறது. நகைச்சுவை, குடும்ப உணர்வுகள், உறவுச் சிக்கல்கள் மற்றும் மனதைத் தொடும் தருணங்கள் என அனைத்தும் நிறைந்திருக்கும் என எதிர்பார்க்கப்படுகிறது. தொடரின் புரோமோக்கள் ஏற்கனவே வெளியாகி ரசிகர்களிடையே பெரும் வரவேற்பைப் பெற்றுள்ளன.
இந்த நீண்ட வெப் தொடரின் ஒவ்வொரு எபிசோடும் புதன்கிழமை தோறும் ஜியோ ஹாட்ஸ்டாரில் வெளியாகும் என்று அறிவிக்கப்பட்டுள்ளது. குடும்பத்துடன் கண்டு ரசிக்க ஏற்ற ஒரு விறுவிறுப்பான தொடராக இது அமையும் என எதிர்பார்க்கப்படுகிறது.
