திருவனந்தபுரத்தில் நேற்று நடைபெற்ற 2026 கேரளா கிரிக்கெட் லீக் இறுதிப் போட்டியின் பரிசளிப்பு விழாவில், இந்திய அணியின் முன்னாள் வேகப்பந்து வீச்சாளர் ஸ்ரீசாந்த் மற்றும் கேரளா கிரிக்கெட் லீக் தூதர் சஞ்சு சாம்சன் ஆகியோர் மேடையில் சந்தித்துக் கொண்டும் கை குலுக்கிக் கொள்ளாதது சமூக வலைதளங்களில் பெரும் விவாதத்தை ஏற்படுத்தியுள்ளது. இது இருவருக்கும் இடையே ஏதேனும் விரிசல் ஏற்பட்டுள்ளதா என்ற சந்தேகத்தை கிளப்பியுள்ளது.
இந்த இறுதிப் போட்டியில், காலிகட் குளோப்ஸ்டார்ஸ் அணியை 4 விக்கெட் வித்தியாசத்தில் வீழ்த்தி திருச்சூர் டைட்டன்ஸ் அணி சாம்பியன் பட்டம் வென்றது. பரிசளிப்பு விழாவில், ஏரிஸ் கொல்லம் செய்லர்ஸ் அணியின் இணை உரிமையாளரான ஸ்ரீசாந்த், தனது அணி வென்ற ஃபேர்பிளே விருதைப் பெற மேடை ஏறினார். அதே மேடையில், கேசிஎல் தொடரின் தூதராகவும் சிறப்பு விருந்தினராகவும் சஞ்சு சாம்சன் நின்றுகொண்டிருந்தார்.
அப்போது, ஸ்ரீசாந்தும் சஞ்சு சாம்சனும் அருகருகே வந்தபோதும் ஒருவரையொருவர் பார்த்து கை குலுக்கிக் கொள்ளவில்லை. இந்த நிகழ்வின் வீடியோ சமூக வலைதளங்களில் வேகமாகப் பரவி, இருவருக்கும் இடையே மோதல் இருப்பதாக ரசிகர்கள் மத்தியில் பரவலாகப் பேசத் தொடங்கியுள்ளனர். இருப்பினும், வெறும் வீடியோவை மட்டும் வைத்து இருவருக்கும் இடையே தனிப்பட்ட பகை இருப்பதாகக் கூறிவிட முடியாது.
உண்மையில், ஸ்ரீசாந்தும் சஞ்சு சாம்சனும் கடந்த 10 ஆண்டுகளுக்கும் மேலாக மிக நெருங்கிய நட்பைக் கொண்டவர்கள். சஞ்சு சாம்சனின் ஆரம்பகால கிரிக்கெட் வாழ்க்கைக்கு ஸ்ரீசாந்த் ஒரு முக்கிய வழிகாட்டியாக இருந்துள்ளார். சஞ்சு சாம்சனை ராஜஸ்தான் ராயல்ஸ் அணியின் தேர்வு ஆட்டத்திற்கு அழைத்துச் சென்று, அவரது திறமைகளை ராகுல் டிராவிட்டிற்கு எடுத்துக்கூறி ஐபிஎல் வாய்ப்பு கிடைக்கச் செய்ததில் ஸ்ரீசாந்தின் பங்கு மகத்தானது.
மேலும், சஞ்சு சாம்சன் கேரளா அணியில் இருந்து நீக்கப்பட்டபோது, மாநில கிரிக்கெட் சங்க அதிகாரிகளை ஸ்ரீசாந்த் கடுமையாக விமர்சித்ததுடன், அதற்காக சஸ்பெண்ட் கூட செய்யப்பட்டார். பல ஆண்டுகளுக்கு முன் கேரளா மாநில அணியில் விளையாடியபோது, ஒரு சில முறை சஞ்சு சாம்சனை ஸ்ரீசாந்த் விமர்சித்து பேசியதாக ஒரு சலசலப்பு எழுந்தது.
ஆனால், பின்னர் இருவரும் நட்புடன் பழகி வந்தனர். இத்தகைய ஆழமான நட்பைக் கொண்ட இருவரும் மேடையில் கைகுலுக்காதது வெறும் தற்செயலான நிகழ்வாக இருக்கவே அதிக வாய்ப்புகள் உள்ளன. இந்த நிகழ்வு குறித்து இருவரிடமிருந்தும் இதுவரை எந்த அதிகாரப்பூர்வ விளக்கமும் வரவில்லை.
இந்த சுவாரசியமான நிகழ்வு, கிரிக்கெட் ரசிகர்கள் மத்தியில் ஒருபுறம் விவாதப் பொருளாக மாறியுள்ளது. மறுபுறம், இருவரின் நட்பு தொடர்கிறதா என்ற கேள்வியையும் எழுப்பியுள்ளது. இந்த விவகாரம் குறித்து மேலும் தகவல்கள் வெளியாகும் என எதிர்பார்க்கப்படுகிறது.
