குஜராத் டைட்டன்ஸ் அணியின் இளம் தமிழக வீரர் சாய் சுதர்சன், டி20 கிரிக்கெட் வரலாற்றில் ஒரு புதிய உலக சாதனையை படைத்து அனைவரையும் வியப்பில் ஆழ்த்தியுள்ளார். கிறிஸ் கெயில் போன்ற ஜாம்பவான்களும் எட்டாத ஒரு மைல்கல்லை, மிகக் குறைந்த இன்னிங்ஸ்களில் எட்டிப் பிடித்து அசத்தியுள்ளார்.
இதுவரை ஆஸ்திரேலியாவின் ஷான் மார்ஷின் பெயரில் இருந்த உலக சாதனையை சாய் சுதர்சன் முறியடித்துள்ளார். ஷான் மார்ஷ் 85 இன்னிங்ஸ்களில் 3000 ரன்களை கடந்த நிலையில், நமது சாய் சுதர்சன் வெறும் 78 இன்னிங்ஸ்களிலேயே இந்த சாதனையை நிகழ்த்தியுள்ளார். இதன் மூலம், சர்வதேச அளவில் 80 இன்னிங்ஸ்களுக்கும் குறைவாக 3000 ரன்களைக் கடந்த முதல் வீரர் என்ற பெருமையை அவர் பெற்றுள்ளார். இந்தப் பட்டியலில் டெவன் கான்வே (86 இன்னிங்ஸ்), கிறிஸ் கெயில் (87 இன்னிங்ஸ்) ஆகியோர் அடுத்தடுத்த இடங்களில் உள்ளனர்.
கொல்கத்தா நைட் ரைடர்ஸ் அணிக்கு எதிரான போட்டியில், 248 ரன்கள் என்ற பிரம்மாண்ட இலக்கை துரத்தியபோது, சாய் சுதர்சன் 28 பந்துகளில் 53 ரன்கள் குவித்து ஆட்டமிழக்காமல் இருந்தார். இந்த வரலாற்றுச் சிறப்புமிக்க 3000 ரன்கள் என்ற மைல்கல்லை அவர் 36 ரன்களைக் கடந்தபோது தொட்டார். குறிப்பாக, கார்த்திக் தியாகி வீசிய ஆட்டத்தின் 18-வது ஓவரில் இந்த சாதனை நிகழ்ந்தது.
இந்திய வீரர்களில், சாய் சுதர்சனுக்கு அடுத்தபடியாக திலக் வர்மா 90 இன்னிங்ஸ்களில் 3000 ரன்களை கடந்து இரண்டாமிடத்தில் உள்ளார். அவரைத் தொடர்ந்து ருதுராஜ் கெய்க்வாட் 91 இன்னிங்ஸ்களிலும், கே.எல்.ராகுல் 93 இன்னிங்ஸ்களிலும் இந்த மைல்கல்லை எட்டியுள்ளனர். தற்போது ஐபிஎல் 2026 தொடரில் அதிக ரன்கள் குவித்தவர்கள் பட்டியலிலும் சாய் சுதர்சன் முதலிடத்தில் உள்ளார். இதுவரை 79 டி20 போட்டிகளில் விளையாடியுள்ள அவர், 43.72 சராசரியுடன் 3017 ரன்கள் குவித்துள்ளார். இதில் 4 சதங்களும் 21 அரைசதங்களும் அடங்கும்.
