ஆவணி மாத சுக்ல பட்ச அஷ்டமி நன்னாள், பகவான் ஸ்ரீகிருஷ்ணர் அவதரித்த திருநாளாகப் போற்றப்படுகிறது. இந்த தினத்தை ஸ்ரீகிருஷ்ண ஜயந்தி அல்லது கோகுலாஷ்டமி என பக்தர்கள் கொண்டாடுகின்றனர். இந்த ஆண்டு, கோகுலாஷ்டமி விழா நாளை, அதாவது செவ்வாய்க்கிழமை, 11.8.2020 அன்று கொண்டாடப்படுகிறது.
தன் தங்கையான தேவகிக்கு பிறக்கும் எட்டாவது குழந்தை தன் உயிருக்கு ஆபத்து என்பதை அறிந்த கம்சன், பெரும் அச்சமடைந்தான். இதனால், தேவகியையும் அவரது கணவர் வசுதேவரையும் சிறையில் அடைத்து, அவர்களைக் கண்கொத்திப் பாம்பாகக் கண்காணித்து வந்தான். எட்டாவது குழந்தைதான் தனக்கு வில்லனாக அமையும் என அறிந்தும், பிறந்த ஒவ்வொரு குழந்தையையும் கம்சன் கொடூரமாகக் கொன்றான். இதனால் வசுதேவரும் தேவகியும் மிகுந்த துயரத்தில் ஆழ்ந்தனர்.
ஏழாவது குழந்தையான பலராமர், தேவகியின் கருவில் இருந்தபோது, ஸ்ரீமகாவிஷ்ணு ஒரு திருவிளையாடல் புரிந்தார். மாயாதேவியை அழைத்து, பலராமரின் கருவை கோகுலத்தில் நந்தகோபரின் மனைவியான ரோகிணியின் கர்ப்பப்பைக்கு மாற்றினார். மேலும், மாயாதேவியை நந்தகோபரின் மற்றொரு மனைவியான யசோதையின் வயிற்றில் கருவாக வளரச் செய்தார். இவ்வாறு, பிறப்புக்கு முன்பே கண்ணன் தனது லீலைகளைத் தொடங்கினான். பின்னர், கிருஷ்ண பகவான் தேவகியின் வயிற்றில் எட்டாவது குழந்தையாக வளர்ந்தார்.
ஆவணி மாத சுக்ல பட்ச அஷ்டமி திதியில் கிருஷ்ணர் அவதரித்தார். அப்போது, தாயும் தந்தையும் மிகுந்த மகிழ்ச்சியடைந்தனர். குழந்தையான கண்ணன், ஸ்ரீமகாவிஷ்ணுவாக விஸ்வரூபமெடுத்து காட்சி தந்தான். இது தேவகி-வசுதேவ தம்பதிக்கு கிடைத்த பெரும் வரமாகவும், அவர்கள் முன்னொரு காலத்தில் பெற்ற வரத்தின் பலனாகவும் அமைந்தது.
முன்னொரு காலத்தில், சுதபா மற்றும் பிருச்னி என்ற தம்பதியினர் 12 தேவ வருடங்கள் கடுந்தவம் புரிந்தனர். அவர்களின் தவத்திற்கு மகிழ்ந்த மகாவிஷ்ணு, அவர்களுக்கு மகனாகப் பிறப்பதாக அருளினார். அதன்படி, பிருச்னி கர்பா என்ற பெயரில் அவர் பிறந்தார். அடுத்த பிறவியில் காஷ்யபர் – அதிதி தம்பதிக்கு மகனாக உபேந்திரனாகப் பிறந்தார். இப்போது, இந்த பிறவியில் கிருஷ்ணராக அவதரித்துள்ளதாக மகாவிஷ்ணு தெரிவித்தார்.
மேலும், இந்த பிறவியுடன் அவர்களின் பிறவி முடிவடைவதாகவும், வைகுண்டம் செல்லும் காலம் நெருங்கிவிட்டதாகவும், கம்சனை அழிக்கும் கடமை தனக்கு இருப்பதாகவும் திருமால் கூறினார். தன்னை கோகுலத்தில் உள்ள நந்தகோபரின் மனைவி யசோதையிடம் சேர்த்துவிடும்படியும், அதற்குப் பதிலாக அங்கு பிறக்கும் பெண் குழந்தையை இங்கு கொண்டு வந்து சேர்த்துவிடும்படியும் அறிவுறுத்தினார்.
இத்தகைய அற்புதங்கள் நிகழ்ந்த நன்னாளே ஆவணி சுக்ல பட்ச அஷ்டமித் திருநாள், அதாவது கிருஷ்ண ஜயந்தி ஆகும். இந்த புனித நாளில், வீட்டு வாசலில் தொடங்கி பூஜையறை வரை பகவான் ஸ்ரீகிருஷ்ணரை குழந்தையாக பாவித்து வரவேற்று வழிபடுவது வழக்கம். அரிசி மாவில் கிருஷ்ணரின் பாதங்களை வரைந்து வழிபடுவது, நம் துயரங்களையெல்லாம் போக்கி மகிழ்வைக் கொடுக்கும் என ஞானநூல்கள் கூறுகின்றன.
நாளை மாலை வரை விரதமிருந்து, கிருஷ்ணருக்குப் பிடித்த சீடை போன்ற பட்சணங்களை நைவேத்தியம் செய்து வழிபடுவது சிறப்பு. உண்மையான பக்தியுடன் கிருஷ்ண ஜயந்தி அன்று பூஜை செய்தால், கிருஷ்ணர் ஏதேனும் ஒரு ரூபத்தில் நம் வீட்டிற்கே வந்து, தீய அனைத்தையும் அழித்து, வறுமையைப் போக்கி சகல ஐஸ்வரியங்களையும் தந்தருள்வார். கிருஷ்ண பக்தியுடன் கோகுலாஷ்டமியைக் கொண்டாடுவோம்.
