இந்தியாவில் மின்சார ஸ்கூட்டர்களின் பயன்பாடு நாளுக்கு நாள் அதிகரித்து வரும் நிலையில், முன்னணி நிறுவனங்கள் பலவும் இ-ஸ்கூட்டர் தயாரிப்பில் தீவிரமாக ஈடுபட்டு வருகின்றன. இந்த வரிசையில், சிம்பிள் எனர்ஜி நிறுவனம் இந்திய சந்தையில் தனது புதிய இ-ஸ்கூட்டரான 'Simple Wave' ஐ அறிமுகப்படுத்தியுள்ளது.
இந்த புதிய Simple Wave இ-ஸ்கூட்டர் மொத்தம் நான்கு விதமான பேட்டரி வேரியண்டுகளில் கிடைக்கிறது. அவை 5 கிலோவாட், 3.7 கிலோவாட், 2.7 கிலோவாட் மற்றும் 2.2 கிலோவாட் பேட்டரி திறன்களுடன் வருகின்றன. மேலும், இந்த இ-ஸ்கூட்டர் மூன்று முக்கிய வேரியண்டுகளாக விற்பனைக்கு வந்துள்ளது. அவை: Simple Wave +, Simple Wave, மற்றும் Simple Wave S ஆகும். Simple Wave + மாடலில் 5 கிலோவாட் பேட்டரி பொருத்தப்பட்டுள்ளது. Simple Wave மாடலில் 3.7 கிலோவாட் அல்லது 2.7 கிலோவாட் பேட்டரி இடம்பெற்றுள்ளது. Simple Wave S மாடலில் 2.7 கிலோவாட் அல்லது 2.2 கிலோவாட் பேட்டரி உள்ளமைக்கப்பட்டுள்ளது.
மைலேஜ் என்று வரும்போது, Simple Wave இ-ஸ்கூட்டர் அசத்தலான செயல்திறனை வெளிப்படுத்துகிறது. இதன் 5 கிலோவாட் பேட்டரி கொண்ட வேரியண்ட் ஒருமுறை முழுமையாக சார்ஜ் செய்யப்பட்டால், 243 கிலோமீட்டர் தூரம் வரை பயணிக்க முடியும். 3.7 கிலோவாட் பேட்டரி கொண்ட வேரியண்ட் 171 கி.மீட்டர் மைலேஜையும், 2.7 கிலோவாட் பேட்டரி வேரியண்ட் 132 கி.மீட்டர் மைலேஜையும், 2.2 கிலோவாட் பேட்டரி வேரியண்ட் 110 கி.மீட்டர் மைலேஜையும் வழங்குகிறது.
இந்த இ-ஸ்கூட்டரின் மோட்டார் ஆற்றல், பேட்டரி வேரியண்டைப் பொறுத்து 6.4 கிலோவாட் முதல் 4.5 கிலோவாட் வரை மாறுபடும். இதன் டாப் வேரியண்டில் அதிகபட்சமாக மணிக்கு 90 கி.மீட்டர் வேகத்தில் செல்ல முடியும். மேலும், இதில் 12 இன்ச் அலாய் சக்கரங்கள் பொருத்தப்பட்டுள்ளன. சஸ்பென்ஷன் அமைப்பைப் பொறுத்தவரை, முன்பக்கம் டெலிஸ்கோபிக் சஸ்பென்ஷனும், பின்பக்கம் ட்வின்ஷாக் அப்சார்பர்ஸ் சஸ்பென்ஷனும் கொடுக்கப்பட்டுள்ளது.
Simple Wave இ-ஸ்கூட்டரின் எக்ஸ்-ஷோரூம் விலை ரூபாய் 1 லட்சத்து 99 ஆயிரத்து 999 என நிர்ணயிக்கப்பட்டுள்ளது. ஒவ்வொரு வேரியண்டிற்கும் ஏற்ப விலை மாறுபடும். இதன் முன்பக்க பிரேக் டிஸ்க் வகையிலும், பின்பக்க பிரேக் ட்ரம் வகையிலும் அமைக்கப்பட்டுள்ளது. இந்த இ-ஸ்கூட்டரின் கிரவுண்ட் கிளியரன்ஸ் 175 மி.மீட்டர் ஆகவும், இருக்கை உயரம் 775 மி.மீட்டர் ஆகவும் உள்ளது. மேலும், இது 150 கிலோகிராம் வரை எடையைத் தாங்கும் திறன் கொண்டது. 70 லிட்டர் கொள்ளளவு கொண்ட டிக்கி வசதியும் இதில் உள்ளது.
சிறப்பு அம்சங்களைப் பொறுத்தவரை, Simple Wave இ-ஸ்கூட்டரில் 7 இன்ச் TFT டிஸ்ப்ளே பொருத்தப்பட்டுள்ளது. இதன் பேட்டரியை 80 சதவீதம் வரை சார்ஜ் செய்ய சுமார் 2 மணி 15 நிமிடங்கள் ஆகும். ஐபி 67 பேட்டரி ரேட்டிங் உடன் வருகிறது. ப்ளூடூத் இணைப்பு, ஜிபிஎஸ் நேவிகேஷன், ஜிபிஎஸ் ட்ராக்கிங் போன்ற வசதிகளும் இதில் அடங்கும். யுஎஸ்பி சார்ஜிங் வசதியும் வழங்கப்பட்டுள்ளது. டாப் வேரியண்டில் ட்ராக்ஷன் கண்ட்ரோல், ரிஜெனரேட்டிவ் பிரேக்கிங், ஹில் ஹோல்ட் அசிஸ்ட், ரிவர்ஸ் மோட் போன்ற மேம்பட்ட வசதிகள் உள்ளன. கிராவ்ல் மோட் மற்றும் வாகன ட்ராக்கிங் வசதியும் இதில் இடம்பெற்றுள்ளது. எல்இடி முகப்பு விளக்குகள் மற்றும் டிஆர்எல்எஸ் விளக்குகளும் பொருத்தப்பட்டுள்ளன.
1347 மி.மீட்டர் வீல்பேஸ் கொண்ட இந்த இ-ஸ்கூட்டரில், மற்ற எந்த இ-ஸ்கூட்டரிலும் இல்லாத வகையில் பெரிய டிக்கி வசதி கொடுக்கப்பட்டுள்ளது. ஏற்கனவே, அதிக மைலேஜ் தரும் இ-ஸ்கூட்டர்கள் என்ற பெருமையை சிம்பிள் எனர்ஜி நிறுவனம் பெற்றிருக்கும் நிலையில், இந்த புதிய Simple Wave இ-ஸ்கூட்டர் மீது வாடிக்கையாளர்கள் மத்தியில் பெரும் எதிர்பார்ப்பு உருவாகியுள்ளது.
சிம்பிள் வேவ் இ-ஸ்கூட்டர் தற்போது அறிமுகமாகியுள்ள நிலையில், சிம்பிள் எனர்ஜி நிறுவனம் விரைவில் தனது சிம்பிள் அரைவ் இ-ஸ்கூட்டரையும் அறிமுகப்படுத்த திட்டமிட்டுள்ளது.
