சமூக வலைதளங்களில் பரவி வரும் முதலமைச்சர் விஜய்யின் டீப்ஃபேக் வீடியோக்கள் தொடர்பாக சிபிசிஐடி சைபர் கிரைம் பிரிவினர் வழக்குப்பதிவு செய்து தீவிர விசாரணை மேற்கொண்டுள்ளனர். பொதுமக்களை ஏமாற்றும் நோக்கில், முதலமைச்சர் விஜய் பேசுவது போல் செயற்கை நுண்ணறிவு (AI) தொழில்நுட்பத்தின் மூலம் உருவாக்கப்பட்ட இந்தி மொழி வீடியோ ஒன்று முகநூல் மற்றும் பிற சமூக ஊடகங்களில் பரவியுள்ளது.
இந்த வீடியோவில், பொதுமக்கள் பண உதவி தேவைப்பட்டால் குறிப்பிட்ட வாட்ஸ்அப் எண்ணைத் தொடர்பு கொள்ளுமாறு கூறப்பட்டுள்ளது. இது சந்தேகத்திற்கிடமான மோசடி வீடியோ என கண்டறியப்பட்டதை அடுத்து, சிபிசிஐடி சைபர் கிரைம் பிரிவில் 01.09.2026 அன்று வழக்குப்பதிவு செய்யப்பட்டு விசாரணை தொடங்கப்பட்டது. போலியான வீடியோ தொடர்பான தகவல்களைப் பெற மெட்டா நிறுவனத்திடம் கோரிக்கை விடுக்கப்பட்டுள்ளதுடன், சமூக ஊடகங்களில் இருந்து அவற்றை நீக்கும் நடவடிக்கையும் மேற்கொள்ளப்பட்டு வருகிறது.
முதற்கட்ட விசாரணையில், முதலமைச்சர் விஜய்யின் தோற்றத்தில் உருவாக்கப்பட்ட இதுபோன்ற பல AI காணொளிகள் பேஸ்புக் மட்டுமின்றி, மற்ற சமூக ஊடக தளங்களிலும் பரப்பப்பட்டு வருவது தெரியவந்துள்ளது. இவற்றில் பல பாகிஸ்தானைச் சேர்ந்த பேஸ்புக் ஐடிகளிலிருந்து பகிரப்பட்டிருக்கலாம் என சந்தேகிக்கப்படுகிறது. குற்றவாளிகளை விரைவாக அடையாளம் கண்டு சட்ட நடவடிக்கை எடுக்கவும், போலி காணொளிகளை அகற்றவும் துரித நடவடிக்கைகள் எடுக்கப்பட்டு வருகின்றன.
தமிழ்நாடு காவல்துறையின் வேண்டுகோள்:
இதுபோன்ற மோசடி காணொளிகளில் குறிப்பிடப்படும் தொலைபேசி எண்களை பொதுமக்கள் தொடர்பு கொள்ள வேண்டாம் என அறிவுறுத்தப்பட்டுள்ளது. மேலும், அவற்றில் பகிரப்படும் வாட்ஸ்அப் குழுக்களில் இணையவோ அல்லது அவற்றின் மூலம் கூறப்படும் வழிமுறைகளைப் பின்பற்றவோ வேண்டாம் என்றும் வலியுறுத்தப்பட்டுள்ளது.
செயற்கை நுண்ணறிவு (AI) தொழில்நுட்பத்தின் மூலம் உருவாக்கப்படும் 'Deep Fake' காணொளிகளில் முதலமைச்சர் விஜய் போன்று ஆள்மாறாட்டம் செய்து வெளியிடப்படும் போலியான பதிவுகள் குறித்து பொதுமக்கள் விழிப்புடன் இருக்குமாறு தமிழ்நாடு காவல்துறை கேட்டுக்கொள்கிறது. மேலும், இதுபோன்ற இணையவழி மோசடிகளிலிருந்து தங்களைப் பாதுகாத்துக் கொள்ளும் வகையில், தங்களது குடும்பத்தினர், நண்பர்கள் மற்றும் சுற்றத்தாரிடமும் இத்தகவலை எடுத்துரைத்து விழிப்புணர்வை ஏற்படுத்த வேண்டும் என்றும் தமிழ்நாடு காவல்துறை கேட்டுக்கொண்டுள்ளது.
இந்த டீப்ஃபேக் வீடியோக்கள் பொதுமக்களிடையே பெரும் அதிர்ச்சியை ஏற்படுத்தியுள்ளதுடன், இது தொடர்பாக உரிய நடவடிக்கை எடுக்க வேண்டும் என்ற கோரிக்கையும் வலுத்துள்ளது. சிபிசிஐடி விசாரணையின் மூலம் குற்றவாளிகள் விரைவில் சட்டத்தின் முன் நிறுத்தப்படுவார்கள் என எதிர்பார்க்கப்படுகிறது.
சமூக வலைதளங்களில் பரவும் இதுபோன்ற போலி செய்திகள் மற்றும் வீடியோக்கள் குறித்து பொதுமக்கள் எச்சரிக்கையுடன் இருக்க வேண்டும் என தொடர்ந்து வலியுறுத்தப்பட்டு வருகிறது. தவறான தகவல்களைப் பரப்புவோர் மீது கடும் நடவடிக்கை எடுக்கப்படும் என்றும் எச்சரிக்கை விடுக்கப்பட்டுள்ளது.
முதலமைச்சர் விஜய்யின் நற்பெயருக்கு களங்கம் விளைவிக்கும் நோக்கில் பரப்பப்படும் இந்த டீப்ஃபேக் வீடியோக்கள் குறித்து சிபிசிஐடி சைபர் கிரைம் பிரிவு தீவிர விசாரணை நடத்தி வருகிறது. மேலும் பல தகவல்கள் விரைவில் வெளியாகும் என எதிர்பார்க்கப்படுகிறது.
