தமிழ் இலக்கிய உலகிலும் வரலாற்று ஆராய்ச்சித் துறையிலும் முக்கியப் பங்காற்றி வரும் பிரபல எழுத்தாளர் கடற்கரய் மத்தவிலாச அங்கதம், எழுத்தாளர்கள் சந்திக்கும் அவமதிப்புகள் மற்றும் பொருளாதாரச் சவால்கள் குறித்துத் தனது முகநூல் பக்கத்தில் வெளியிட்ட காரசாரமான பதிவு இலக்கிய வட்டாரத்தில் பெரும் விவாதத்தைக் கிளப்பியுள்ளது. சமூகப் பாதுகாப்பு மற்றும் விரக்தியான அணுகுமுறைகள் குறித்து அவர் பதிவிட்டுள்ள ஆதங்கம், பலரின் கவனத்தை ஈர்த்துள்ளது.
கடலூர் மாவட்டம் விருத்தாசலத்தில் 1978 ஆம் ஆண்டு பிறந்த கடற்கரய், தனது இயற்பெயரான ஹைதர் கான் என்பதை மத அடையாளங்களைத் தவிர்க்கும் நோக்கில் 'கடற்கரய்' என மாற்றிக்கொண்டவர். ஆரம்பத்தில் 'குங்குமம்', 'குமுதம்' போன்ற இதழ்களிலும் 'புதிய தலைமுறை' தொலைக்காட்சியிலும் பணியாற்றிய இவர், பின்னர் முழு நேர ஆராய்ச்சியில் ஈடுபட்டார். குறிப்பாக, ஏ.கே. செட்டியாரின் படைப்புகளைத் திரட்டுவதற்காக 9 ஆண்டுகள் செலவிட்டு, 2,500 பக்கங்களுக்கும் அதிகமான ஆவணங்களைத் தொகுத்து வெளியிட்டார்.
'காஃப்காவின் கரப்பான்பூச்சி', 'கண்ணாடி கிணறு' போன்ற கவிதைத் தொகுப்புகள், 'பாரதி விஜயம்', 'யாமறிந்த புலவன்', 'மணிக்கொடி சினிமா', நடிகர் எம்.என். நம்பியாரின் சுயசரிதையான ‘நான் வில்லன் அல்ல’ மற்றும் ‘பராசக்தி தடை’ உள்ளிட்ட பல நூல்களை இவர் எழுதியுள்ளார். ஆனந்த விகடன் நம்பிக்கை விருது, சிற்பி அறக்கட்டளை விருது, ஜெயந்தன் விருது உள்ளிட்ட பல கௌரவங்களையும் பெற்றுள்ளார்.
தொடர்ந்து வரலாற்று ஆய்வு நூல்களை வெளியிட்டு வரும் நிலையில், தன்னிடம் பலர் கேட்கும் கேள்விகள் தன்னை அலுப்படையச் செய்வதாகக் குறிப்பிட்டுள்ள கடற்கரய், தனது முகநூலில் தனது ஆதங்கத்தை வெளிப்படுத்தியுள்ளார். 'பலரும் என்னிடம் வழக்கமாக மூன்று கேள்விகளைத் தான் கேட்கிறார்கள்: உங்க சொந்த பெயர் என்ன? நீங்க என்ன ஊர்? சென்னையில் எங்க இருக்கீங்க? வாசகர்கள் இதைக் கேட்டால் கூட மன்னிக்கலாம்; ஆனால் சக எழுத்தாளர்களே இதைக் கேட்கிறார்கள்' என அவர் குறிப்பிட்டுள்ளார்.
மேலும், 'சமீபத்தில் ஒரு மூத்த எழுத்தாளர் என்னிடம், 'பெருசு பெருசா புக் போடுறீங்களே, சோத்துக்கு என்ன செய்றீங்க?' என்று கேட்டார். 'பிச்சை எடுக்கவில்லை' என்றுதான் என் மனதில் தோன்றியது. எழுத வந்தது அவ்வளவு பெரிய குற்றமா?' என்று வேதனையுடன் கேள்வி எழுப்பியுள்ளார். இது எழுத்தாளர்களின் பொருளாதார நிலை குறித்த ஒரு முக்கிய கேள்வியை எழுப்புகிறது.
அரசு மற்றும் அமைப்புகளின் போக்கையும் அவர் கடுமையாக விமர்சித்துள்ளார். 'கள்ளச் சாராயம் காய்ச்சி சிறைக்குச் சென்றவர் திருந்தி வாழ அரசு சார்பில் நிதி உதவி வழங்குவதாகப் படிக்கிறோம். அதே கருணையைச் சற்றே கண் திறந்து எழுத்தாளர்கள் பக்கமும் காட்டுங்கள். ஒரு ராணுவ வீரனின் விருதை ரிக்ஷா ஓட்டுனரோ, சிறந்த மருத்துவர் விருதைப் பூக்கார அம்மாவோ வாங்க முடியாது. ஆனால் உ.வே.சா அவர்களின் எழுத்தில் எட்டுப் பக்கம் கூட படிக்காதவர்கள் அவர் பெயரிலான விருதைப் பெற முடிகிறது. கடந்த 75 ஆண்டுகளாக இங்கு அறிவுத்துறை அழுகிக் கிடக்கிறது' எனத் தனது கண்டனத்தைப் பதிவு செய்துள்ளார்.
தமிழின் மிக முக்கியமான படைப்பாளியும் ஆய்வாளருமான கடற்கரையின் இந்த வெளிப்படையான முகநூல் பதிவு, தமிழ்நாட்டில் எழுத்தாளர்களின் பொருளாதார நிலைமை மற்றும் விருதுகள் வழங்கப்படும் முறைமை குறித்த புதிய விவாதத்தைத் தொடக்கி வைத்துள்ளது. இது இலக்கிய உலகில் ஒரு முக்கிய பேசுபொருளாக மாறியுள்ளது.
