திருவண்ணாமலை அருள்மிகு அண்ணாமலையார் திருக்கோயிலில் இன்று (செப்டம்பர் 1) முதல் பக்தர்கள் செல்போன்களை எடுத்துச் செல்ல தடை விதிக்கப்பட்டுள்ளது. பக்தர்களின் உடைமைகளை பாதுகாப்பாக வைப்பதற்காக கோயில் வளாகத்தில் சிறப்பு பாதுகாப்பு மையங்கள் அமைக்கப்பட்டுள்ளன. இங்கு செல்போன்களை ஒப்படைக்க ஒரு செல்போனுக்கு ரூ.5 கட்டணம் வசூலிக்கப்படும். இந்த கட்டணத்தை டிஜிட்டல் பரிவர்த்தனை மூலம் செலுத்த இயலாது என்றும், ரொக்கமாக மட்டுமே செலுத்த வேண்டும் என்றும் கோயில் நிர்வாகம் தெரிவித்துள்ளது.
உலகப் புகழ்பெற்ற பஞ்சபூத ஸ்தலங்களில் ஒன்றாகவும், அக்னி ஸ்தலமாகவும் விளங்கும் திருவண்ணாமலை அண்ணாமலையார் கோயிலில், சில தினங்களுக்கு முன்பு அமைச்சர் பி.கே. சேகர்பாபு திடீரென ஆய்வு மேற்கொண்டார். ராஜகோபுரம் வழியாக பொது தரிசன வரிசையில் கோயிலுக்குள் சென்ற அவர், பக்தர்கள் தரிசனம் செய்யும்போது எதிர்கொள்ளும் சிரமங்கள் குறித்து கோயில் அதிகாரிகளிடம் கேட்டறிந்தார். வார இறுதி நாட்கள், பௌர்ணமி போன்ற முக்கிய நாட்களில் பக்தர்கள் எந்தெந்த வழிகளில் கோயிலுக்குள் அனுமதிக்கப்படுகிறார்கள், எவ்வாறு தரிசனம் செய்து வெளியேற்றப்படுகிறார்கள் என்பது குறித்தும் அதிகாரிகளுடன் அமைச்சர் ஆய்வு நடத்தினார். மேலும், வரிசைகள் மற்றும் கோயில் வளாகத்தில் பக்தர்களுக்கான அடிப்படை வசதிகள் குறித்தும் ஆய்வு செய்யப்பட்டது.
தொடர்ந்து, கோயிலின் மூன்றாம் பிரகாரத்தில் உள்ள உள்துறை அலுவலகத்தில் மாவட்ட ஆட்சியர் கி.சாந்தி தலைமையில் ஒரு ஆய்வுக் கூட்டம் நடைபெற்றது. இந்தக் கூட்டத்தில், கோயிலில் பக்தர்கள் விரைவாகவும், சிரமமின்றியும் தரிசனம் செய்வதற்கான ஏற்பாடுகள் குறித்து அமைச்சர் பி.கே. சேகர்பாபு அதிகாரிகளுடன் விரிவாக ஆலோசனை நடத்தினார்.
ஆய்வுக்குப் பின்னர் செய்தியாளர்களிடம் பேசிய அமைச்சர் பி.கே. சேகர்பாபு, 'தமிழகத்தில் உள்ள கோயில்களுக்கு பக்தர்கள் ஆன்மிக அமைதியையும், மன நிம்மதியையும் தேடி வருகிறார்கள். மேலும், கோயில்களின் சிற்பங்கள் மற்றும் கட்டிடக் கலையையும் கண்டு ரசிக்க வருகிறார்கள். ஆனால், சிலர் செல்போன்களில் புகைப்படம் எடுப்பது, வீடியோ எடுப்பது, ரீல்ஸ் செய்வது போன்ற செயல்களில் ஈடுபடுவதால், மற்ற பக்தர்களின் ஆன்மிக அனுபவம் பாதிக்கப்படுகிறது' என்று தெரிவித்தார்.
இதனைக் கருத்தில் கொண்டு, தமிழகத்தில் உள்ள முக்கிய கோயில்களில் செல்போன் பயன்பாட்டிற்கு கட்டுப்பாடுகள் விதிக்கப்பட்டு வருவதாகவும், அதன் ஒரு பகுதியாக திருவண்ணாமலை அண்ணாமலையார் கோயிலுக்குள் செப்டம்பர் 1-ம் தேதி முதல் பக்தர்கள் செல்போன் கொண்டு செல்ல தடை விதிக்கப்பட உள்ளதாகவும் அமைச்சர் தெரிவித்தார். மேலும், வரிசைகளில் நீண்ட நேரம் காத்திருக்கும் பக்தர்களுக்கு அவசர உதவி தேவைப்பட்டால் உடனடியாக உதவும் வகையில் தன்னார்வலர்கள் நியமிக்கப்பட உள்ளதாகவும் அவர் கூறினார்.
கோயில் வளாகத்துக்குள் கூடுதல் காவல்துறையினர் பாதுகாப்புப் பணியில் ஈடுபடுத்தப்படுவார்கள் என்றும், பக்தர்களுக்கு அவசர மருத்துவ உதவி வழங்க கூடுதல் மருத்துவர்களும் நியமிக்கப்பட உள்ளதாகவும் அமைச்சர் பி.கே. சேகர்பாபு தெரிவித்தார். இந்த புதிய கட்டுப்பாடுகள் பக்தர்களின் ஆன்மிக அனுபவத்தை மேம்படுத்தும் என எதிர்பார்க்கப்படுகிறது.
