அரச அதிகாரத்தின் உண்மையான முகத்தை நீங்கள் அறிய விரும்புகிறீர்களா? அப்படியானால், நீங்கள் தைரியமாக உண்மையைச் சொல்ல வேண்டும். அதிகாரத்தில் இருப்பவர்கள் தினமும் கூறும் பொய்களை, அவை பொய்கள் என்று மக்களுக்கு எடுத்துரைக்க வேண்டும். மக்களின் நலனுக்கு எதிராக எடுக்கப்படும் அரசு முடிவுகளை உறுதியாக எதிர்க்க வேண்டும். இப்படி நீங்கள் செயல்படத் தொடங்கினாலே, அதிகாரத்தின் கொடூரமான நிழல் உங்களைச் சூழ்ந்துகொள்ளும். மேலும், இந்தச் செயல்களை நீங்கள் தொடர்ந்து செய்தால், அதிகாரத்தின் கோர முகம் உங்கள் முன் வந்து நிற்கும்.
வரலாற்றைப் புரட்டிப் பார்த்தால், மக்களின் பக்கம் நின்று அதிகாரத்தைக் கேள்வி கேட்டவர்கள், எதிர்த்து நின்றவர்கள், அதிகாரத்தின் பகையைப் பெற்றவர்கள் பலர் என்ன ஆனார்கள் என்பதை நாம் அறிவோம். ஒருவருக்கு திடீரென மாரடைப்பு வந்து இறந்துவிட்டதாகக் கூறப்பட்டாலும், உண்மை அதிகாரத்தால் மறைக்கப்பட்டிருக்கலாம். தங்களுக்கு எதிரான கருத்துகளைக் கொண்டவர்கள் துப்பாக்கிச் சூட்டில் கொல்லப்படும்போது, அவர்களைக் கொன்றவர்களை அதிகார வர்க்கம் பாதுகாக்கும்.
இன்றைக்கும் கூட, அதிகாரத்திற்கு எதிராகப் பேசியவர்கள், போராடியவர்கள் சந்தேகத்திற்கிடமான முறையில் கொல்லப்பட்ட பல நிகழ்வுகள் நம் நினைவுக்கு வரலாம். அரசியல்வாதிகளுக்கு எதிராகத் தீர்ப்பு வழங்கிய நீதிபதிகள், அரசுக்கு எதிராக உரக்கப் பேசிய பத்திரிகையாளர்கள், அரசின் மக்கள் விரோதப் போக்கை அம்பலப்படுத்திய ஜனநாயகவாதிகள் எனப் பலரும் பாதிக்கப்பட்டுள்ளனர். இது சமூகத்தின் உயர் மட்டத்தினருக்கு மட்டும் நடப்பதில்லை. அதிகாரத்தை எதிர்த்து நின்ற ஒரு கிராமத்து மனிதன் அல்லது மக்களின் உரிமைகளுக்காகப் போராடிய ஒரு சாதாரண கவுன்சிலர் கூட படுகொலை செய்யப்பட்டிருக்கலாம். இந்தத் திரைப்படம், நீங்கள் கேள்விப்பட்ட, ஆனால் சில நாட்களில் மறைக்கப்பட்ட இதுபோன்ற படுகொலைகளை உங்களுக்கு நினைவூட்டும்.
உண்மையைச் சொன்னால், இதுபோன்ற படுகொலைகளின் மீதும், அடக்குமுறையின் மீதும் தான் அரசதிகாரம் நிலைத்து நிற்கிறது. இது நம் நாட்டில் மட்டுமல்ல, உலகம் முழுவதும் இதே நிலைதான். கிரேக்க நாட்டின் மிக முக்கியமான இடதுசாரி அரசியல்வாதியும், மனித உரிமைச் செயற்பாட்டாளருமான கிரிகோரிஸ் லம்ப்ராகிஸ், மக்களாட்சி என்ற பெயரில் ஆட்சியைக் கைப்பற்றிய அரசுகளால் படுகொலை செய்யப்பட்டார். அவர் காலத்தில் கிரேக்கத்தில் ராணுவ ஆட்சி நிலவினாலும், அடக்குமுறைகளுக்குப் பயந்து அவர் பின்வாங்கவில்லை. அவர் உரக்கப் பேசினார்.
கிரிகோரிஸ் லம்ப்ராகிஸ் ஒரு இடதுசாரி சிந்தனையாளர் மட்டுமல்ல, ஒரு மனித உரிமைச் செயற்பாட்டாளர், மக்களுக்கான மருத்துவர், மற்றும் திறமையான தடகள வீரரும் கூட. பல ஆண்டுகளாக நீளம் தாண்டுதலில் தேசிய சாம்பியனாக இருந்தவர். விளையாட்டு சமூக மாற்றத்திற்கான கருவி என்று நம்பியவர். இரண்டாம் உலகப் போரின்போது, நாஜிகளின் ஆக்கிரமிப்பில் இருந்த கிரேக்கத்தில், நோயுற்ற மக்களுக்கு இலவச மருத்துவம் பார்த்தார். மக்களின் பசியைப் போக்க தன்னால் இயன்றதைச் செய்தார். மிக முக்கியமாக, அரசதிகாரத்தை எதிர்த்த அனைத்து இயக்கங்களுடனும் அவர் நெருக்கமாக இருந்தார். இதுவே அவர் அதிகாரத்தால் குறிவைக்கப்படக் காரணம்.
கிரேக்கத்தில் 1950-1960 காலகட்டத்தில் வலதுசாரிகள் ஆட்சியில் இருந்தனர். சோவியத் யூனியன் உலகின் நம்பிக்கையாக மாறிக்கொண்டிருந்த நேரம் அது. வலதுசாரி அரசாங்கம் கம்யூனிச எதிர்ப்பு நடவடிக்கைகளில் தீவிரமாக ஈடுபட்டது. இடதுசாரிகளின் ஒவ்வொரு அசைவும் கண்காணிக்கப்பட்டது. காவல்துறை மற்றும் வலதுசாரிகள் இணைந்து இடதுசாரிகளுக்கு எதிராகச் செயல்பட்டனர். 1963 இல், கிரிகோரிஸ் லம்ப்ராகிஸ் ஏதென்ஸ் நகரில் அணு ஆயுதங்களுக்கு எதிரான அமைதிப் பேரணியை முன்னெடுத்தார். காவல்துறையும் வலதுசாரிகளும் தடைகளை ஏற்படுத்தினாலும், 'நான் ஒருவனே மிச்சமிருந்தாலும் நடப்பேன்' என்று கூறி, அமைதிப் பதாகையுடன் அவர் தனியாக நடந்தார். கைது செய்யப்பட்டாலும், அந்தச் செயல் அரச எதிர்ப்பின் சின்னமாக மாறியது.
சில மாதங்களுக்குப் பிறகு, தெசலோனிக்கி நகரில் உரையாற்றிவிட்டு வெளியே வந்தபோது, காவல்துறையினர் வேடிக்கை பார்க்க, வலதுசாரிகளால் தாக்கப்பட்டு, சிகிச்சைப் பலனின்றி இறந்தார். இந்தக் குற்றத்தை மறைக்க அரசாங்கமும் அதிகாரிகளும் முயன்றனர். மக்கள் கிரிகோரிஸ் லம்ப்ராகிஸிற்கு ஆதரவாகப் போராடத் தொடங்கினர். அந்தப் போராட்டங்களில் 'Z' என்ற எழுத்தை எழுதத் தொடங்கினர். பழமையான கிரேக்கத்தில் 'Z' என்பதற்கு 'அவர் இன்னும் வாழ்கிறார்' என்று அர்த்தம். மனசாட்சியுள்ள ஒவ்வொரு கிரேக்க மக்களையும் பாதித்த கிரிகோரிஸ் லம்ப்ராகிஸின் மரணம், கிரீஸின் முக்கிய எழுத்தாளரான வாசிலிஸ் வாசிலிகோஸையும் பாதித்தது. அரசியல் அடக்குமுறைகளுக்கு எதிராக எழுதிய அவர், கிரிகோரிஸ் லம்ப்ராகிஸின் பெயரை நேரடியாகக் குறிப்பிடாமல், 'Z' என்ற தலைப்பில் நாவலாக எழுதினார்.
இந்த நாவல் பல மொழிகளில் மொழிபெயர்க்கப்பட்டு, பரவலாக வாசிக்கப்பட்டது. இதை அடிப்படையாக வைத்து, 1969 இல் கிரேக்கத்தின் முக்கிய இயக்குநர் கோஸ்டா கவ்ராஸ், 'Z' என்ற பெயரில் திரைப்படமாக எடுத்தார். '1967 இல் கிரேக்கத்தில் நடந்த ராணுவ ஆட்சி என்னை மிகவும் பாதித்தது. அந்த அநீதி, அந்த அடக்குமுறை என்னுள் கோபத்தை உருவாக்கியது. Z அந்தக் கோபத்தின் வெளிப்பாடுதான்' என்று அவர் கூறினார். படத்தின் தொடக்கத்தில், ராணுவ அதிகாரிகள், சமூகத்தைப் பாதிக்கும் கம்யூனிசம் எனும் கருத்தியல் பூஞ்சையை எப்படி கட்டுப்படுத்துவது என்று இளம் அதிகாரிகளுக்கு அறிவுறுத்துகின்றனர். கடவுள் சிவப்பர்களுக்கு ஒளி தருவதில்லை என்று இடதுசாரிகளைக் கட்டுப்படுத்துவது பற்றி விவாதிக்கின்றனர். ராணுவத்தாலும் வலதுசாரிகளாலும் வெறுக்கப்படும் மருத்துவர் மற்றும் இடதுசாரி சிந்தனையாளரான Z, அதிகாரத்தை எதிர்த்து நின்றதால் குறிவைக்கப்பட்டார்.
