புதிய மின் இணைப்பு பெறுவோருக்கு ஒரு நற்செய்தி! தமிழ்நாட்டில் வீட்டு உபயோகத்திற்காக 4 கிலோ வாட் வரையிலான புதிய மின் இணைப்புக்கு விண்ணப்பிப்பவர்களுக்கு, இனி நேரடி கள ஆய்வு தேவையில்லை என தமிழ்நாடு மின்சார வாரியம் அறிவித்துள்ளது. இந்த புதிய நடைமுறை வரும் ஆகஸ்ட் 28 ஆம் தேதி முதல் அமலுக்கு வருகிறது.
முன்னதாக, தமிழ்நாடு சட்டப்பேரவையில் எரிசக்தி மற்றும் சட்டத்துறை அமைச்சர் நிர்மல்குமார் வெளியிட்ட அறிவிப்பின்படி, ஒருமுனை வீட்டு மின் இணைப்புக்கான (நீட்டிப்பு அல்லது மேம்பாட்டுப் பணிகள் தேவையில்லாதவை) விண்ணப்பதாரர்களுக்கு, சுய உறுதிமொழி அடிப்படையில் மின் இணைப்பு வழங்கப்படும் எனத் தெரிவிக்கப்பட்டிருந்தது. இந்த நடவடிக்கை, புதிய மின் இணைப்பு கோரும் வீட்டு விண்ணப்பதாரர்களுக்கான செயல்முறைகளை எளிதாக்கும் நோக்கில் எடுக்கப்பட்டுள்ளது.
இதன் தொடர்ச்சியாக, தமிழ்நாடு மின் பகிர்மானக் கழகத்தில் 4 கிலோ வாட் வரை உள்ள புதிய வீட்டு மின் இணைப்புகளுக்கு, விரிவாக்கம் அல்லது மேம்பாட்டுப் பணிகள் தேவையில்லாத பட்சத்தில், கள ஆய்வு இல்லாமல் மின் இணைப்பு வழங்கும் புதிய நடைமுறை ஆகஸ்ட் 28 முதல் நடைமுறைக்கு வருகிறது.
இது தொடர்பாக அனைத்து தலைமைப் பொறியாளர்கள் மற்றும் மேற்பார்வைப் பொறியாளர்களுக்கு தமிழ்நாடு மின்பகிர்மானக் கழகம் அனுப்பியுள்ள கடிதத்தில், ஆன்லைன் மூலம் விண்ணப்பிக்கும்போது, தேவையான ஆவணங்களுடன் விண்ணப்பதாரரே மின் இணைப்பு வழங்க வேண்டிய இடத்தின் ஜிபிஎஸ் இருப்பிடக் குறியீடுகளைப் பதிவு செய்ய வேண்டும் என்று குறிப்பிடப்பட்டுள்ளது. மேலும், ஆவணங்களின் அச்சு நகல்களைச் சமர்ப்பிக்கக் கூடாது என்றும் அறிவுறுத்தப்பட்டுள்ளது.
விண்ணப்பதாரர் அளிக்கும் ஜிபிஎஸ் தகவல்கள் ஜிஐஎஸ் செயலி மூலம் சரிபார்க்கப்படும். தகவல்கள் சரியாக இருந்தால், கள ஆய்வு இல்லாமல் விண்ணப்பம் அடுத்தக்கட்டத்துக்கு அனுப்பப்படும். சரிபார்ப்பில் தவறுகள் கண்டறியப்பட்டால், வழக்கமான கள ஆய்வு நடைமுறை மேற்கொள்ளப்படும். ஜிபிஎஸ் சரிபார்ப்பு முடிந்ததும், மதிப்பீடு செய்யப்பட்டு, மின் இணைப்பு வழங்கும் போது மீட்டர் பொருத்தப்படும் இடத்தின் உண்மையான ஜிபிஎஸ் தகவலும் பதிவு செய்யப்பட்டு சரிபார்க்கப்படும்.
மின்சாரம் வழங்குவதற்கு வீட்டில் மின்சார சாதனங்கள் பொருத்தப்பட்டு தயார் நிலையில் இல்லாவிட்டால், வீட்டின் உரிமையாளருக்கு மின் இணைப்பு வழங்க தயார் நிலையில் உள்ளதற்கான தகவல் மின்னஞ்சல் மற்றும் எஸ்எம்எஸ் மூலம் தெரிவிக்கப்படும். மேலும், மின் இணைப்பு வழங்குவதற்கான கருவிகளைப் பொருத்தி ஒரு மாதத்திற்குள் சரிசெய்து கொள்ள வேண்டும் எனவும் அறிவுறுத்தப்படும். ஒரு மாதத்திற்குள் குறைபாடுகள் சரிசெய்யப்பட்டு மின் இணைப்பு பெறாவிட்டால், விண்ணப்பம் காலாவதியானதாகக் கருதப்பட்டு ரத்து செய்யப்படும். மீட்டர் பாதுகாப்புக் கட்டணத்தைத் தவிர பிற கட்டணங்கள் திருப்பித் தரப்படாது.
சரிபார்ப்பு தோல்வியுற்றால், அந்த விண்ணப்பம் ஜிஎஸ்ஐ மொபைல் செயலியின் ஆய்வுப் பட்டியலில் சேர்க்கப்பட்டு, வழக்கமான விண்ணப்பமாகக் கருதப்பட்டு அதன் ஆய்வு நிலைகளைப் பின்பற்றித் தொடரப்படும். விண்ணப்பத்தை ஆய்வு செய்தல் அல்லது மாற்றங்கள் குறித்த தகவல்கள் விண்ணப்பதாரருக்குத் தெரிவிக்கப்படும். இந்த புதிய நடைமுறை ஆகஸ்ட் 28 முதல் ஆன்லைனில் பதிவு செய்யப்படும் புதிய விண்ணப்பங்களுக்கு மட்டுமே பொருந்தும்.
இது குறித்து தமிழ்நாடு மின்சார வாரிய ஊழியர் ஒருவர் கூறுகையில், 'தமிழ்நாட்டில் விண்ணப்பம் செய்த 24 மணி நேரத்திற்குள் மின் இணைப்பு வழங்க வேண்டும் என்பது விதி. ஆனால், விண்ணப்பம் செய்த பின்னர் வீட்டில் மின் இணைப்பு வழங்குவதற்கு தயார் நிலையில் உள்ளதா என்பதை வணிக ஆய்வாளர் நேரில் சென்று உறுதி செய்வார். அதன் தொடர்ச்சியாக பீல்டுமேன் நேரில் சென்று மின் இணைப்பை பொருத்துவார். அப்போது மின் இணைப்பு எண் உள்ளிட்டவை வழங்கப்படும். ஆனால் எந்த வீட்டிலும் மின் இணைப்பு 24 மணி நேரத்தில் வழங்க முடிவதில்லை. ஆன்லைனில் விண்ணப்பிக்கும்போது ஜிஎஸ்ஐ குறியீடு சரியாக காண்பிக்காவிட்டால் மின் இணைப்பு வழங்க முடியாத நிலை உருவாகும்' என்றார்.
