இளம் தலைமுறை ரசிகர்களின் மனதில் நீங்கா இடம் பிடித்திருக்கும் இயக்குநர் லோகேஷ் கனகராஜ், இப்போது வெள்ளித்திரையில் கதாநாயகனாக அறிமுகமாகிறார்.
'மாநகரம்', 'கைதி', 'மாஸ்டர்', 'விக்ரம்', 'லியோ' போன்ற வெற்றிப் படங்களைத் தொடர்ந்து, தற்போது 'கூலி' படத்தையும் இயக்கி வருகிறார். இவரது அதிரடி ஆக்ஷன் படங்களுக்கு இளைஞர்கள் மத்தியில் பெரும் வரவேற்பு உள்ளது. இந்நிலையில், இயக்குநராக மட்டுமல்லாமல், நடிகராகவும் தனது பயணத்தைத் தொடங்கியுள்ளார்.
சன் பிக்சர்ஸ் தயாரிப்பில் உருவாகியுள்ள 'DC' என்ற புதிய படத்தில் லோகேஷ் கனகராஜ் கதாநாயகனாக நடித்துள்ளார். இந்தப் படத்தை 'கேப்டன் மில்லர்' பட இயக்குநர் அருண் மாதேஸ்வரன் இயக்கியுள்ளார். பாலிவுட் நடிகை வாமிகா கபி கதாநாயகியாக நடிக்க, ராக்ஸ்டார் அனிருத் ரவிச்சந்தர் இசையமைத்துள்ளார்.
முன்னதாக, காதலர் தினத்தை முன்னிட்டு வெளியான 'பிளடி வாலண்டைன்' ப்ரோமோ வீடியோவில், லோகேஷ் 'தேவதாஸ்' ஆகவும், வாமிகா 'சந்திரா' ஆகவும் தோன்றினர். இது ஒரு அதிரடி கேங்ஸ்டர் கதையாக இருக்கும் என ரசிகர்கள் ஆவலுடன் எதிர்பார்க்கின்றனர். படத்தின் படப்பிடிப்பு நிறைவடைந்த நிலையில், நாளை மாலை 6:00 மணிக்கு ரசிகர்களுக்காக இணையதளங்களில் அதிகாரப்பூர்வ டிரெய்லர் வெளியாகவுள்ளது. விரைவில் திரையரங்குகளில் படம் வெளியாகும் என்றும் படக்குழு அறிவித்துள்ளது.
