கோயம்புத்தூர் மாவட்டம், பொள்ளாச்சிக்கு அருகில் உள்ள ஆனைமலையில் மாசாணி அம்மன் அருள்பாலித்து வருகிறார். அம்மன் வழிபாடுகளில், குறிப்பாக மயான தேவதையான மாசாணி அம்மனின் வழிபாடு மிகவும் முக்கியத்துவம் வாய்ந்ததாகக் கருதப்படுகிறது. பொதுவாக அம்மன் சிலைகள் நின்ற நிலையிலோ அல்லது அமர்ந்த நிலையிலோ கோயில்களில் அமைக்கப்பட்டிருக்கும். ஆனால், இங்கு மட்டும் 17 அடி நீளத்தில் சயன நிலையில் அம்மன் காட்சி அளிப்பது தனிச்சிறப்பு.
தலபுராணத்தின்படி, ஆற்றில் மிதந்து வந்த ஒரு மாங்கனியை உண்டதால், மன்னனின் உத்தரவின் பேரில் கொலை செய்யப்பட்ட ஒரு இளம் பெண்ணை மயானத்தில் சமாதி செய்து, அதன் மீது அந்தப் பெண்ணின் உருவத்தை உருவாக்கி மக்கள் வழிபடத் தொடங்கினர். மயான மண்ணில் சயனித்த நிலையில் அமைக்கப்பட்டதால், 'மாசாணி' என்ற பெயர் நாளடைவில் நிலைத்தது. 'மயான சயனி' என்று அழைக்கப்பட்ட பெயர் காலப்போக்கில் 'மாசாணி'யாக மாறியதாகக் கூறப்படுகிறது.
சீதையைத் தேடி ராமர் தெற்கு நோக்கி பயணித்தபோது, ஆனைமலை உம்பாற்றின் கரையில் உள்ள மயானத்தில் ஆதிபராசக்தி அருட்கோலம் கொண்டு ஆட்சி புரிவதைக் கண்டு, அங்கு ஒரு மேடை அமைத்து அம்மனை வழிபட்டு அருள் பெற்றதாக தலபுராணம் கூறுகிறது.
மாசாணி அம்மன் நீதி தேவதையாகவும் அருள் புரிவதால், நம்பிக்கை துரோகம் இழைக்கப்பட்டவர்கள், திருடப்பட்ட பொருளை இழந்தவர்கள், எதிரிகளால் பாதிக்கப்பட்டவர்கள் எனப் பலரும் இங்கு வந்து நீதி கோருகின்றனர். இங்குள்ள நீதி கல்லில் மிளகாய் அரைத்துப் பூசி, தனக்கு நீதி கிடைக்க அம்மனிடம் முறையிடுவார்கள். அவர்களின் முறையீடு நியாயமானதாக இருந்தால், தவறு செய்தவர்களை அம்மன் தண்டிப்பார் என்பதே இந்த நீதிக்கல்லின் மகிமையாக நம்பப்படுகிறது. ஆடி மாதத்தில் அம்மன் திருவருளைப் பெற பக்தர்கள் பெருமளவில் இங்கு வந்து தரிசனம் மேற்கொள்கின்றனர்.
ஆடி மாதம் அம்மன் வழிபாட்டிற்கு மிகவும் உகந்த மாதமாகும். இந்த மாதத்தில் மாசாணி அம்மனை தரிசிப்பது மிகுந்த பலன்களைத் தரும் என்பது பக்தர்களின் நம்பிக்கையாகும். அம்மனின் சயனக் கோல தரிசனமும், நீதிக்கல் மகிமையும் பக்தர்களை வெகுவாகக் கவர்கின்றன. சிறப்பு பூஜைகள் மற்றும் வழிபாடுகள் ஆடி மாதம் முழுவதும் நடைபெறும். இந்த ஆன்மீக அனுபவத்தைப் பெற பக்தர்கள் ஆவலுடன் காத்திருக்கின்றனர்.
