நானி, கீர்த்தி சுரேஷ் நடிப்பில் உருவாகி வரும் 'தி பாரடைஸ்' திரைப்படம் குறித்த வதந்திகளுக்கு படக்குழுவினர் விளக்கம் அளித்துள்ளனர். படத்தின் சில காட்சிகள் மீண்டும் படமாக்கப்பட உள்ளதாக வெளியான தகவல்கள் முற்றிலும் ஆதாரமற்றவை என்றும், திட்டமிட்டபடி படப்பிடிப்பு விறுவிறுப்பாக நடைபெற்று வருவதாகவும் படக்குழு திட்டவட்டமாக தெரிவித்துள்ளது.
'தி பாரடைஸ்' திரைப்படம், ஸ்ரீகாந்த் ஓடிலா இயக்கத்தில் பிரம்மாண்டமாக உருவாகி வருகிறது. இந்தப் படத்தில் நானி, கீர்த்தி சுரேஷ், சாய் பல்லவி உள்ளிட்ட பல முன்னணி நட்சத்திரங்கள் நடித்து வருகின்றனர். பெரும் பொருட்செலவில் உருவாகி வரும் இப்படத்தின் படப்பிடிப்பு இன்னும் முழுமையாக நிறைவடையவில்லை. இந்நிலையில், படமாக்கப்பட்ட சில காட்சிகள் நானிக்கு திருப்தி அளிக்காததால், அவை மீண்டும் படமாக்கப்பட உள்ளதாகவும், இதனால் படத்தின் வெளியீட்டு தேதி தள்ளிப்போகும் எனவும் தகவல்கள் வெளியாகின. இந்த தகவல்கள் சினிமா வட்டாரத்தில் பெரும் அதிர்ச்சியை ஏற்படுத்தின.
இந்நிலையில், இதுகுறித்து 'தி பாரடைஸ்' படக்குழுவினர் ஒரு செய்திக் குறிப்பை வெளியிட்டுள்ளனர். அதில், 'கடந்த சில நாட்களாக, 'தி பாரடைஸ்' திரைப்படம் குறித்து பல ஆதாரமற்ற வதந்திகளும், யூகங்களும் பரப்பப்படுவதை நாங்கள் கவனிக்கிறோம். இதைத் தெளிவுபடுத்த விரும்புகிறோம். 'தி பாரடைஸ்' திரைப்படம் முதல் நாளிலிருந்தே முழுமையான தெளிவுடன் திட்டமிடப்பட்டது. தற்போது அதன் பணிகள் திட்டமிட்டபடியே மிகச் சரியாக நடைபெற்று வருகின்றன. 100 நாட்களுக்கும் மேலான படப்பிடிப்புப் பணிகள் ஏற்கெனவே வெற்றிகரமாக நிறைவடைந்துவிட்டன. மீதமுள்ள படப்பிடிப்பும் எவ்வித தாமதமுமின்றி, திட்டமிட்டபடியே நடைபெற்று வருகிறது. இன்றுவரை, இப்படத்தில் ஒரு காட்சி கூட மறுபடப்பிடிப்பு செய்யப்படவில்லை. எதிர்காலத்திலும் 'தி பாரடைஸ்' படத்திற்காக எந்தவொரு மறுபடப்பிடிப்பும் திட்டமிடப்படவில்லை' என்று தெரிவித்துள்ளனர்.
மேலும், 'இப்படத்தின் ஒவ்வொரு கட்டப் பணியும், முதலில் உருவாக்கப்பட்டபோது எத்தகைய பிரம்மாண்டத்துடனும், துல்லியத்துடனும், உறுதியுடனும் கற்பனை செய்யப்பட்டதோ, அதே தரத்துடனும், தீவிரத்துடனும் தற்போது செயல்படுத்தப்பட்டு வருகிறது. எங்களுடைய தரப்பில் இருந்து வெளியிடப்படும் தகவல்களை மட்டுமே நம்புமாறு கேட்டுக் கொள்கிறோம். இனிவரும் காலங்களில், இப்படம் குறித்துப் பரப்பப்படும் எந்தவொரு தவறான தகவலுக்கும் நாங்களே நேரடியாகப் பதிலளிப்போம். 'தி பாரடைஸ்' திட்டமிட்ட பாதையில் மிகச் சிறப்பாகப் பயணித்து வருகிறது. ஆகஸ்ட் 21-ம் தேதி பிரம்மாண்டமாக வெளியாகும்' என்றும் படக்குழுவினர் உறுதியளித்துள்ளனர். படத்தின் மீதான எதிர்பார்ப்பு இந்த விளக்கத்தால் மேலும் அதிகரித்துள்ளது.
