இந்தியாவின் தென்கோடி எல்லையில், கன்னியாகுமரியில் அன்னை பகவதி அம்மன் கன்னியாக வீற்றிருந்து அருள்பாலித்து வருகிறார். ஒரு கன்னிப் பெண்ணால் மட்டுமே தனக்கு மரணம் நிகழ வேண்டும் என பிரம்மதேவரிடம் வரம் பெற்றிருந்தான் பாணாசுரன். அவனது கொடுமைகளில் இருந்து தங்களைக் காப்பாற்றும்படி தேவர்களும் முனிவர்களும் மகாவிஷ்ணுவிடம் தஞ்சமடைந்தனர். மகாவிஷ்ணுவின் ஆலோசனையின் பேரில், பார்வதி தேவியை நோக்கி அவர்கள் தவம் புரிந்தனர். அவர்களின் வேண்டுதலுக்கு இணங்க, அன்னை பார்வதி ஒரு கன்னிப் பெண்ணாக குமரிக் கண்டத்தில் அவதரித்தாள். சிவபெருமானை மணக்க விரும்பிய அன்னை, கன்னியாகுமரியில் கடல் நடுவே உள்ள பாறையில் ஒற்றைக்காலில் தவம் மேற்கொண்டாள். திருமணத்திற்காக காத்திருந்த சிவபெருமான் குறித்த நேரத்தில் வர இயலாததால், கோபமடைந்த தேவி, திருமணப் பொருட்களை கடலில் வீசிவிட்டு மீண்டும் தவத்தில் ஆழ்ந்தாள். பின்னர், தன்னை மணந்து கொள்ளும்படி வற்புறுத்திய பாணாசுரனை வதம் செய்ய அன்னை முடிவெடுத்தாள். விஜயதசமி அன்று, கன்னியாகுமரியில் இருந்து ஆண் உடை தரித்து குதிரையில் ஏறி மகாதானபுரத்திற்குச் சென்ற தேவி, பாணாசுரனை வதம் செய்தாள். அதன் பிறகு, மீண்டும் கன்னியாகுமரி கடற்கரையில் தவக்கோலத்துடன் பகவதி அம்மனாக அருளாட்சி செய்து வருகிறாள். இக்கோயிலில் புரட்டாசி நவராத்திரி திருவிழா மற்றும் வைகாசி திருவிழா ஆகியவை வெகு விமரிசையாக கொண்டாடப்படுகின்றன. இந்த நாட்களில் நடைபெறும் தேரோட்டம் மற்றும் தெப்போற்சவத்தின் போது, ஏராளமான பக்தர்கள் குவிந்து அம்மனை தரிசனம் செய்வர். மேலும், கன்னிகா பூஜை, சுயம்வர பூஜைகள் செய்வதும், கடற்கரையில் தங்கள் முன்னோருக்கு தர்ப்பணம் செய்வதும் இங்கு நேர்த்திக் கடனாக நடைபெறுகிறது.
