தவெக சட்டமன்ற உறுப்பினரை திமுகவைச் சேர்ந்த நிர்வாகி ஒருவர் அணுகி, கட்சித் தாவக் கோரி பேரம் பேசிய விவகாரம் பெரும் பரபரப்பை ஏற்படுத்தியுள்ளது. இந்தச் சம்பவத்தில், திமுக ஒன்றிய செயலாளராகக் கூறப்படும் கணேசன் உட்பட மூன்று பேர் நேற்று கைது செய்யப்பட்டுள்ளனர். உசிலம்பட்டி தொகுதியின் தவெக சட்டமன்ற உறுப்பினர் விஜயிடம், திமுகவைச் சேர்ந்த கணேசன் என்பவர், திருநாவுக்கரசு என்பவரின் உதவியுடன் கட்சித் தாவக் கோரி பேரம் பேசியதாகத் தகவல்கள் தெரிவிக்கின்றன. இச்சம்பவம் தொடர்பாக, பேரம் பேசியதற்கான ஆடியோ ஆதாரங்கள் காவல்துறையிடம் சமர்ப்பிக்கப்பட்டுள்ளதாகவும், அதன் அடிப்படையில் கணேசன் கைது செய்யப்பட்டதாகவும் கூறப்படுகிறது. கணேசன், தன்னை தவெகவில் இணைய விரும்புவதாக அறிமுகப்படுத்திக் கொண்டு, மதுரையில் வைத்து அந்த சட்டமன்ற உறுப்பினரைச் சந்தித்ததும் விசாரணையில் தெரியவந்துள்ளது. ஒவ்வொரு சட்டமன்ற உறுப்பினருக்கும் சுமார் 35 கோடி ரூபாய் முதல் 50 கோடி ரூபாய் வரை பேரம் பேசப்பட்டதாகத் தகவல்கள் தெரிவிக்கின்றன. இந்த விவகாரத்தில் மேலும் யாருக்கெல்லாம் தொடர்பு உள்ளது என்பது குறித்து காவல்துறையினர் தீவிர விசாரணை மேற்கொண்டு வருகின்றனர். இந்தச் சம்பவம் அரசியல் களத்தில் பெரும் அதிர்வலைகளை ஏற்படுத்தியுள்ளது.
