முதலமைச்சர் மாவட்ட ஆட்சியர்கள் மற்றும் காவல்துறை அதிகாரிகளுடன் சட்டம் ஒழுங்கு குறித்து ஆய்வு நடத்திய அதே நாளில், மாநிலத்தில் சட்டம் ஒழுங்கு சீர்குலைந்துள்ளதாக திமுக கடுமையாக விமர்சித்துள்ளது. இதுகுறித்து திமுக தனது அதிகாரப்பூர்வ எக்ஸ் (முன்னர் ட்விட்டர்) பக்கத்தில் வெளியிட்டுள்ள பதிவில், மயிலாடுதுறை மாவட்டம் தரங்கம்பாடி அருகே புதுப்பாளையம் கிராமத்தில் நடந்த துயரச் சம்பவத்தை சுட்டிக்காட்டியுள்ளது. காதலித்த 19 வயது இளைஞரும், 16 வயது பெண்ணும் வெவ்வேறு சமூகங்களைச் சேர்ந்தவர்கள். இவர்களின் காதல் விவகாரத்தில் எழுந்த பிரச்சினையால், இருவரும் ஒரு குடிசையில் தூக்கிட்டு தற்கொலை செய்து கொண்டதாகக் கூறப்படுகிறது. இந்த மர்ம மரணங்கள் பல சந்தேகங்களை எழுப்பியுள்ளன.
'சிங்கப்பெண்' என்ற பெயரில் செயல்படுத்தப்படும் திட்டத்தின் ஆட்சியில், பிளஸ் 2 படிக்கும் மாணவியின் உயிருக்குக்கூட பாதுகாப்பு இல்லாத மோசமான சூழல் நிலவுவதாக திமுக குற்றம்சாட்டியுள்ளது. மேலும், வடமாநிலங்களில் மட்டுமே காணப்பட்ட வீடுகளை இடிக்கும் சம்பவங்கள், தற்போது தமிழ்நாட்டிலும் மயிலாடுதுறை மாவட்டத்தில் அரங்கேறியுள்ளன. இரு குடும்பத்தினருக்கு இடையேயான பிரச்சினையில் வீடுகளும் வாகனங்களும் நொறுக்கப்பட்ட புதிய அபாயம் ஏற்பட்டுள்ளது.
சினிமாக்களில் மட்டுமே காணக்கூடிய கொடூரமான வில்லத்தனக் காட்சிகளை தமிழ்நாடு நிஜத்தில் அனுபவிக்கத் தொடங்கியுள்ளதாகவும், முதலமைச்சர் ஆய்வு நடத்திய நாளிலேயே இத்தனை கொடூரங்களும் அரங்கேறியிருப்பது சட்டம் ஒழுங்கு மிக மோசமாக சீரழிந்திருப்பதையே காட்டுவதாகவும் திமுக தனது பதிவில் குறிப்பிட்டுள்ளது. குதிரை பேரத்தில் எம்எல்ஏக்களை விலைக்கு வாங்கும் 'சோபா மாடல்' அரசின் முதலமைச்சர், தனது கட்டுப்பாட்டில் உள்ள சட்டம் ஒழுங்கின் மீது இனியாவது கவனம் செலுத்துவாரா என்றும் கேள்வி எழுப்பியுள்ளது.
மேலும், திமுக இதை விமர்சிக்காமல் அல்லது கேள்வி கேட்காமல் 6 மாதங்கள் காத்திருந்தால், அநியாயமாக பறிபோன இரண்டு உயிர்களைத் திரும்பக் கொண்டு வந்துவிட முடியுமா என்றும் 'ரீல்ஸ் முதலமைச்சர்' என குறிப்பிட்டு திமுக விமர்சித்துள்ளது.
