திருப்பூர் அருகே யூடியூப் வீடியோக்களைப் பார்த்து வீட்டிலேயே பிரசவம் பார்த்ததால் உடல்நிலை பாதிக்கப்பட்ட 32 வயது பெண், கோவை தனியார் மருத்துவமனையில் சிகிச்சை பலனின்றி உயிரிழந்தார். இந்த துயரச் சம்பவம் அப்பகுதியில் பெரும் சோகத்தை ஏற்படுத்தியுள்ளது.
சசிகலா என்ற அந்தப் பெண்ணின் முதல் குழந்தை சிசேரியன் மூலம் பிறந்திருந்தது. இதனால், இரண்டாவது குழந்தையை இயற்கை முறையில் வீட்டிலேயே பெற்றெடுக்க அவர் முடிவு செய்துள்ளார். அவரது கணவரும், மாமியாரும் சேர்ந்து யூடியூப் மூலம் கற்றுக்கொண்டபடி பிரசவம் பார்த்துள்ளனர். இதில், அதீத ரத்தப்போக்கு ஏற்பட்டதால் அவர் உடனடியாக மருத்துவமனையில் அனுமதிக்கப்பட்டார்.
மருத்துவமனைக்கு கொண்டு வரப்பட்டபோது, அவரது நிலைமை மிகவும் மோசமாக இருந்துள்ளது. மருத்துவர்களின் தீவிர சிகிச்சை அளித்தும் பலனின்றி அவர் பரிதாபமாக உயிரிழந்தார். பிரசவத்திற்குப் பிறகு நஞ்சுக்கொடி வெளியேறாமல் போனதாலும், அதீத ரத்தப்போக்கு ஏற்பட்டதாலும் அவர் உயிரிழந்ததாக மருத்துவர்கள் தெரிவித்துள்ளனர்.
உயிரிழந்த பெண்ணின் குழந்தை தற்போது அரசு மருத்துவர்களின் கண்காணிப்பில் நலமுடன் இருப்பதாக தகவல்கள் தெரிவிக்கின்றன. வீட்டிலேயே பிரசவம் பார்ப்பதன் ஆபத்துகள் குறித்து மருத்துவர்கள் தொடர்ந்து எச்சரித்து வரும் நிலையில், இந்த சம்பவம் பெரும் அதிர்ச்சியை ஏற்படுத்தியுள்ளது.
