நீட் தேர்வு வினாத்தாள்கள் பாதுகாப்பாக கொண்டு செல்லப்படுவதை உறுதி செய்யும் வகையில், மதுரை விமான நிலையத்திற்கு வினாத்தாள்களை ஏற்றிச் சென்ற வாகனம் திடீரென பழுதாகி நின்றதால் பரபரப்பு ஏற்பட்டது. இளநிலை மருத்துவப் படிப்புக்கான நீட் தேர்வு வினாத்தாள் கசிவு மற்றும் முறைகேடுகள் தொடர்பாக எழுந்த சர்ச்சைகளைத் தொடர்ந்து, தேசிய தேர்வு முகமை (NTA) இந்த ஆண்டுக்கான தேர்வை ரத்து செய்து, ஜூன் 21ஆம் தேதி மறுதேர்வு நடத்தப்படும் என அறிவித்துள்ளது.
தேர்வில் முறைகேடுகளைத் தடுக்க கடுமையான நடவடிக்கைகள் எடுக்கப்பட்டு வருவதாகவும், மாணவர்களின் குறைகளைக் கண்டறிய பிரத்யேக இணையதளம் அறிமுகப்படுத்தப்பட்டுள்ளதாகவும் NTA தெரிவித்துள்ளது. இந்நிலையில், தேர்வு பாதுகாப்பான முறையில் நடைபெறுவதை உறுதி செய்யவும், மாணவர்களின் நம்பிக்கையை மீட்டெடுக்கவும், ராணுவ விமானங்களைப் பயன்படுத்தி வினாத்தாள்களை கொண்டு செல்ல NTA முடிவு செய்தது.
அதன்படி, மதுரையிலிருந்து நெல்லைக்கு வினாத்தாள்களை ராணுவ ஹெலிகாப்டர் மூலம் கொண்டு செல்ல ஏற்பாடு செய்யப்பட்டது. மதுரை விமான நிலையத்திற்கு அஞ்சல் வாகனத்தில் வினாத்தாள்கள் கொண்டு செல்லப்பட்டபோது, வாகனம் திடீரென பழுதாகி நடுரோட்டில் நின்றது. உடனடியாக காவல்துறை மற்றும் மத்திய தொழில் பாதுகாப்பு படை வீரர்கள் செயல்பட்டு, 10 நிமிடங்களுக்குள் மாற்று வாகனத்தை வரவழைத்து வினாத்தாள்களை எடுத்துச் சென்றனர். இந்த சம்பவத்தால் அப்பகுதியில் சிறிது நேரம் பதற்றம் நிலவியது.
வினாத்தாள்கள் இந்திய ராணுவ ஹெலிகாப்டர்கள் மூலம் தேர்வு மையங்களுக்கு கொண்டு செல்லப்படவுள்ள நிலையில், அதற்கான ஒத்திகை திருநெல்வேலி ஆயுதப்படை மைதானத்தில் நேற்று நடைபெற்றது குறிப்பிடத்தக்கது.
