ஆப்கானிஸ்தானுக்கு எதிரான முதல் ஒருநாள் போட்டியில் இந்திய அணி அபார வெற்றி பெற்ற நிலையில், நட்சத்திர வீரர் ரோஹித் சர்மா ரன் அவுட் ஆனது பெரும் விவாதத்தை ஏற்படுத்தியது. இது குறித்து முன்னாள் இந்திய வேகப்பந்து வீச்சாளர் மோகித் சர்மா விளக்கம் அளித்துள்ளார்.
தர்மசாலாவில் நடைபெற்ற இந்தப் போட்டியில், இந்திய அணி 195 ரன்கள் என்ற இலக்கை நோக்கி விளையாடியது. ஆட்டத்தின் 6வது ஓவரில், ரோஹித் சர்மா (16 ரன்கள்) பந்தை தட்டிவிட்டு ரன் எடுக்க ஓடினார். ஆனால், மறுமுனையில் இருந்த சுப்மன் கில் ரன் எடுக்க வரவில்லை. இதனால் ரோஹித் சர்மா பாதியிலேயே ரன் அவுட் ஆனார். 16 பந்துகளில் 2 பவுண்டரி, 1 சிக்சர் என நல்ல ஃபார்மில் இருந்த ரோஹித், மிகுந்த கோபத்துடன் மைதானத்தை விட்டு வெளியேறினார்.
இது குறித்து கிரிக்பஸ் தளத்தில் பேசிய மோகித் சர்மா, இந்த ரன் அவுட்டில் சுப்மன் கில்லை மட்டும் குறை சொல்ல முடியாது என்றார். அவர் கூறுகையில், 'நிச்சயமாக அது ரோஹித் சர்மாவின் அழைப்புதான். அதை ஏற்று சுப்மன் கில்லும் ஓடத் தொடங்கினார். ஆனால், ஆப்கானிஸ்தான் பந்துவீச்சாளர் கசான்பர் குறுக்கே வந்து கில்லின் பாதையை மறைத்துவிட்டார். இதனால் கில்லால் முன்னேறிச் செல்ல முடியவில்லை. அதே நேரத்தில் ரோஹித் சர்மா பாதி தூரத்தைக் கடந்திருந்ததால், அவரால் மீண்டும் தனது எல்லைக்குச் செல்ல நேரமில்லை. கசான்பர் குறுக்கே வராமல் இருந்திருந்தால், அந்த ரன் எளிதாகப் பூர்த்தியாகி இருக்கும்' என்றார்.
போட்டி முடிந்த பிறகு பேசிய கேப்டன் சுப்மன் கில், ரோஹித் சர்மா முதலில் அதிருப்தியில் இருந்தார். ஆனால், டிரெஸ்ஸிங் ரூமிற்குச் சென்று ரீப்ளே பார்த்த பிறகு அவர் சமாதானம் அடைந்தார். இதில் யாருடைய தவறும் இல்லை என்பதை அவர் புரிந்து கொண்டார் என்று கூறினார். இந்த ஆட்டத்தில் 66 பந்துகளில் 84 ரன்கள் குவித்து ஆட்டநாயகன் விருது வென்ற கில், ஆப்கான் வீரர் குர்பாஸின் அதிரடி ஆட்டத்தையும் பாராட்டினார். ஆப்கானிஸ்தான் வீரர் குர்பாஸ் 48 பந்துகளில் சதம் விளாசி சாதனை படைத்தது குறிப்பிடத்தக்கது. இந்திய பந்துவீச்சாளர்கள் கடைசி நேரத்தில் சிறப்பாகச் செயல்பட்டு ஆப்கானிஸ்தானை 194 ரன்களுக்குள் கட்டுப்படுத்தியதும் வெற்றிக்கு முக்கியக் காரணமாக அமைந்தது. இந்திய அணி தற்போது 3 போட்டிகள் கொண்ட தொடரில் 1-0 என முன்னிலை பெற்றுள்ளது. இத்தொடரின் 2வது போட்டி ஜூன் 17 அன்று லக்னோவில் நடைபெறவுள்ளது.
