சீனாவில் 'துணைவரை வாடகைக்கு எடுக்கும்' என்ற ஒரு புதிய மற்றும் விசித்திரமான தொழில் பிரபலமடைந்து வருகிறது. காசு கொடுத்து ஒருவரை வாடகைக்கு அமர்த்தி, அவருடன் கடைக்குச் செல்லலாம், சினிமா பார்க்கலாம், ஹோட்டலில் சாப்பிடலாம், ஏன், நீண்ட தூரப் பயணங்கள் கூட மேற்கொள்ளலாம்.
நகர்ப்புறங்களில் பலரும் நல்ல வேலையிலும், வசதியான வாழ்க்கையிலும் இருந்தாலும், மாலையில் வீடு திரும்பும்போது பேசுவதற்கோ, உடன் இருப்பதற்கோ யாரும் இல்லாமல் தனிமையில் தவிக்கின்றனர். மக்களின் இந்த மனரீதியான தேவையை ஒரு பெரிய வணிகமாக சீனா மாற்றியுள்ளது. தினமும் அலுவலக வேலைகளில் அதிக நேரம் செலவிடுவதால், குடும்பத்தினருடனோ அல்லது நண்பர்களுடனோ நேரம் ஒதுக்க முடியாத நிலை பலருக்கும் உள்ளது. இந்தச் சூழலில்தான் 'தோழமைப் பொருளாதாரம்' என்ற புதிய டிரெண்ட் அங்கு வேகமாக வளர்ந்து வருகிறது.
இந்தச் சேவையின்படி, மக்கள் தங்களுடன் சும்மா நடைப்பயிற்சி செல்ல, திரைப்படம் பார்க்க அல்லது மனதைத் திறந்து பேச ஒருவரை வாடகைக்கு எடுத்து, மணிநேர அடிப்படையில் பணம் செலுத்துகின்றனர். முக்கியமாக, இந்த உறவில் காதல், திருமணம் அல்லது பாலியல் ரீதியான எந்தவிதமான ஈடுபாடும் இருக்காது. இது முற்றிலும் சில மணிநேரங்கள் மட்டுமே நீடிக்கும் ஒரு 'தொழில்முறை நட்பு' ஆகும்.
சீனாவில் இதற்கென பிரத்யேகமாகப் பல ஆன்லைன் ஆப்கள் மற்றும் இணையதளங்கள் செயல்படுகின்றன. இவை, தனிமையில் வாடுபவர்களையும், துணையாகச் சென்று பணம் சம்பாதிக்க விரும்புபவர்களையும் இணைக்கின்றன. தனியாக ஷாப்பிங் செல்ல பயப்படுபவர்கள், காபி அருந்தும்போது பேச ஆள் தேடுபவர்கள், வெளியூர்களுக்குத் தனியாகப் பயணம் செய்ய விரும்பாதவர்கள் எனப் பலதரப்பட்டோர் இந்தச் சேவையைப் பயன்படுத்துகின்றனர். இது இளைஞர்களுக்கு மட்டுமின்றி, வீட்டில் தனியாக வசிக்கும் முதியவர்களுக்கும் ஒரு வரப்பிரசாதமாக அமைந்துள்ளது. இந்தத் தொழில் சீனாவில் பல ஆயிரம் கோடி ரூபாய் மதிப்பை எட்டியுள்ளதுடன், இங்கு பணிபுரிபவர்கள் மாதம் 50,000 முதல் 70,000 வரை சம்பாதிக்கின்றனர்.
