சர்வதேச கிரிக்கெட் அரங்கில் இருந்து நியூசிலாந்தின் மூத்த வீரர் கேன் வில்லியம்சன் ஓய்வு பெறுவதாக அறிவித்துள்ள நிலையில், இந்திய நட்சத்திர வீரர் விராட் கோலி அவருக்கு நெகிழ்ச்சியான வாழ்த்துகளைத் தெரிவித்துள்ளார். சமகால கிரிக்கெட்டின் சிறந்த பேட்ஸ்மேன்களில் ஒருவரான வில்லியம்சனின் ஓய்வு முடிவைத் தொடர்ந்து, அவரது நண்பரான கோலி தனது சமூக வலைதளப் பக்கத்தில் உருக்கமான பதிவை வெளியிட்டுள்ளார்.
வில்லியம்சனின் சாதனைகளைத் தாண்டி, இருவருக்கும் இடையே பல ஆண்டுகளாக நீடிக்கும் நட்பு மற்றும் பரஸ்பர மரியாதையை கோலி தனது பதிவில் குறிப்பிட்டுள்ளார். 'பல வருடப் பயணத்தில், வெறும் எதிரியாகத் தொடங்கி இன்று ஒரு நல்ல நண்பனாக மாறி இருக்கிறீர்கள். இத்தனை ஆண்டுகளாக நீங்கள் பேட்டிங் செய்வதைப் பார்ப்பதும், உங்களுக்கு எதிராக விளையாடுவதும் எனக்குக் கிடைத்த பெருமகிழ்ச்சி. ஆனால், எல்லாவற்றையும் விட நமது நட்பையும், கிரிக்கெட் குறித்தும் அதற்கு அப்பாலும் நாம் பகிர்ந்து கொண்ட பார்வைகளையும் நான் பெரிதும் மதிக்கிறேன்' என்று கோலி குறிப்பிட்டுள்ளார்.
வில்லியம்சனின் அடுத்தகட்ட வாழ்க்கைக்கு வாழ்த்துகளைத் தெரிவித்த கோலி, 'நாம் சந்திக்கும் போதோ அல்லது பேசும் போதோ கிடைக்கும் நினைவுகளை நான் எப்போதும் பொக்கிஷமாகக் கருதுகிறேன். எனது அன்பான சகோதரனுக்கு எப்போதும் என் நல்வாழ்த்துகள். நீங்கள் உங்களின் பங்களிப்பைச் கச்சிதமாகச் செய்துவிட்டீர்கள், இப்போது ஓய்வெடுக்க முழுத் தகுதியுடன் இருக்கிறீர்கள். வாழ்த்துகள் நண்பா, உங்களது புதிய வாழ்க்கை இப்போதுதான் தொடங்கியிருக்கிறது' என்றும் உருக்கமாகப் பதிவிட்டுள்ளார்.
சமகாலத்தில் அபார திறமையால் சர்வதேச கிரிக்கெட், இளையோர் கிரிக்கெட் மற்றும் ஐபிஎல் போன்ற தொடர்களில் வில்லியம்சனும் கோலியும் தடம் பதித்தவர்கள். மைதானத்தில் கடுமையானப் போட்டியில் ஈடுபட்டாலும், களத்திற்கு வெளியே இவர்களது நட்பு பரஸ்பர மரியாதையுடன் திகழ்ந்தது. ஆஸ்திரேலியாவின் ஸ்டீவ் ஸ்மித், இங்கிலாந்தின் ஜோ ரூட் ஆகியோருடன் இணைந்து, ஃபேப் ஃபோர் (Fab Four) என உலக கிரிக்கெட்டில் கொண்டாடப்பட்டவர்களில் கோலியும் வில்லியம்சனும் மிக முக்கியமானவர்கள். கடந்த 10 ஆண்டுகளில் உலக கிரிக்கெட்டின் தலைசிறந்த பேட்ஸ்மேன்கள் யார் என்ற விவாதத்தில் இந்த நால்வரும் எப்போதும் ஆதிக்கம் செலுத்தி வந்தனர்.
சர்வதேச கிரிக்கெட்டில் இருந்து விடைபெறும் நியூசிலாந்தின் முன்னாள் கேப்டன் கேன் வில்லியம்சன், 93 சர்வதேச டி20 போட்டிகளில் 2,575 ரன்களும், 175 ஒருநாள் போட்டிகளில் 15 சதங்களுடன் 7,256 ரன்களும் குவித்துள்ளார். டெஸ்ட் கிரிக்கெட்டில் 110 போட்டிகளில் விளையாடி 54.06 சராசரியுடன் 9,515 ரன்களைக் குவித்துள்ளார். இதில் 33 சதங்கள் மற்றும் 38 அரைசதங்கள் அடங்கும். அவரது டெஸ்ட் வாழ்க்கையில் அதிகபட்ச ஸ்கோராக 251 ரன்கள் உள்ளது. புள்ளிவிவரங்கள் அவரது அசாத்திய திறமையை வெளிப்படுத்தினாலும், விராட் கோலி போன்ற சமகால ஜாம்பவான் தெரிவித்துள்ள வாழ்த்து, கிரிக்கெட் உலகிற்கு அப்பால் வில்லியம்சனுக்கு இருக்கும் உயரிய மரியாதையைக் காட்டுகிறது. நியூசிலாந்தின் இந்த ஜென்டில்மேன் கிரிக்கெட் உலகின் என்றும் அழியா பெருமையுடன் கம்பீரமாக விடைபெறுகிறார்.
