சிவகங்கையில் அதிர்ச்சி சம்பவம்! தவெக (தமிழ்நாடு இளைஞர் கட்சி) உறுப்பினர் நவீன் (24) மர்ம நபர்களால் வெட்டி கொலை செய்யப்பட்டார். நேற்று இரவு, ரயில் நிலையம் அருகே உள்ள டாஸ்மாக் பாரில் இருந்து வெளியே வந்தபோது, அரிவாளுடன் வந்த கும்பல் அவரை சரமாரியாக வெட்டியுள்ளது. இதில் சம்பவ இடத்திலேயே நவீன் பரிதாபமாக உயிரிழந்தார்.
சம்பவ இடத்திற்கு விரைந்த சிவகங்கை நகர் காவல்துறையினர், நவீனின் உடலை மீட்டு பிரேத பரிசோதனைக்காக சிவகங்கை அரசு மருத்துவக் கல்லூரி மருத்துவமனைக்கு அனுப்பி வைத்தனர். மருத்துவர்கள் நவீன் இறந்துவிட்டதாக உறுதி செய்த நிலையில், பிரேத பரிசோதனை அறைக்கு உடலைக் கொண்டு செல்லும் போது உடலில் அசைவு இருந்ததாகக் கூறி நவீனின் உறவினர்கள் அதிர்ச்சியடைந்தனர். உடனடியாக பிரேத பரிசோதனையை நிறுத்த வலியுறுத்தி மருத்துவமனை வளாகத்தில் உறவினர்கள் திடீர் போராட்டத்தில் ஈடுபட்டனர்.
இதுகுறித்து மருத்துவக் கல்லூரி நிர்வாகம் விளக்கம் அளித்துள்ளது. 'நவீன் சம்பவ இடத்திலேயே உயிரிழந்ததை 108 ஆம்புலன்ஸ் பணியாளர்கள் உறுதி செய்திருந்தனர். மருத்துவமனைக்குக் கொண்டு வந்தபோதும் அவர் உயிரிழந்தது உறுதியானது. பிரேத பரிசோதனை அறைக்கு உடலை எடுத்துச் செல்லும் போது, சாலை குண்டும் குழியுமாக இருந்ததால் ஏற்பட்ட உடல் அசைவை (Jerk) உறவினர்கள் உயிர் இருப்பதாக தவறாகக் கருதிவிட்டனர். மீண்டும் பரிசோதித்த போதும் அவர் ஏற்கனவே உயிரிழந்தது உறுதி செய்யப்பட்டது' என நிர்வாகம் கூறியுள்ளது.
மருத்துவமனையில் பதற்றமான சூழல் நிலவியதை அறிந்த சிவகங்கை சட்டமன்ற உறுப்பினர் (எம்.எல்.ஏ) குழந்தை ராணி உடனடியாக மருத்துவமனைக்கு விரைந்து வந்து உறவினர்களுடன் பேச்சுவார்த்தை நடத்தினார். இதை அடுத்து உறவினர்கள் போராட்டத்தைக் கைவிட்டனர். இந்த கொலை வழக்கில் 2 பேர் கைது செய்யப்பட்டுள்ளதாகவும், தப்பியோடிய மேலும் சிலரை காவல்துறையினர் தீவிரமாக தேடி வருவதாகவும் தகவல் வெளியாகியுள்ளது.
