90களில் முன்னணி நடிகர்களுடன் நடித்து புகழ்பெற்ற நடிகை சுகன்யாவுக்கு, சந்தனக் கடத்தல் வீரப்பன் அளித்த நேர்காணலில் வெளியான அவதூறான குற்றச்சாட்டுகளுக்காக ரூ.10 லட்சம் இழப்பீடு வழங்க சன் டிவிக்கு சென்னை உயர் நீதிமன்றம் உத்தரவிட்டுள்ளது. இந்த உத்தரவை எதிர்த்து சன் டிவி தாக்கல் செய்த மேல்முறையீட்டு மனுவை நீதிபதி கே. குமரேஷ் பாபு தள்ளுபடி செய்து உத்தரவிட்டார்.
இயக்குநர் பாரதிராஜாவால் 'புது நெல்லு புது நாத்து' திரைப்படம் மூலம் அறிமுகப்படுத்தப்பட்ட சுகன்யா, தமிழ், மலையாளம், கன்னடம், தெலுங்கு உள்ளிட்ட மொழிகளில் சுமார் 15 ஆண்டுகளாக நடித்துள்ளார். 'சின்ன கவுண்டர்', 'திருமதி பழனிச்சாமி', 'இந்தியன்' போன்ற பல வெற்றிப் படங்களில் நடித்துள்ள இவர், கடைசியாக 2019-ல் 'தீ இவன்' படத்தில் நடித்தார். திருமண வாழ்க்கையில் ஏற்பட்ட கருத்து வேறுபாடு காரணமாக விவாகரத்து பெற்ற இவர், மலையாளப் படங்களுக்குப் பாடல்கள் எழுதியுள்ளார்.
1996-ல் வீரப்பன் அளித்த ஒரு நேர்காணலில், நடிகை சுகன்யா குறித்து ஆதாரமற்ற, பொய்யான குற்றச்சாட்டுகள் முன்வைக்கப்பட்டன. முன்னாள் பிரதமர் பி.வி. நரசிம்ம ராவின் மகனுடன் தனக்கு கள்ளத்தொடர்பு இருந்ததாகவும், அது அரசியல் பேரம் பேசுவதற்காக வீடியோ எடுக்கப்பட்டதாகவும் வீரப்பன் கூறியிருந்தார். இந்த குற்றச்சாட்டுகள் முற்றிலும் உண்மையற்றவை என்றும், இதனால் தனது நற்பெயருக்கும், சினிமா வாய்ப்புகளுக்கும், மன நலத்திற்கும் பெரும் பாதிப்பு ஏற்பட்டதாகவும் சுகன்யா தரப்பில் தெரிவிக்கப்பட்டது. தனக்கு ஏற்பட்ட இழப்பு ரூ.1 கோடிக்கு மேல் என்றாலும், நீதிமன்றத்தில் ரூ.10,00,500 இழப்பீடு கோரினார்.
சென்னை சிவில் நீதிமன்றம் 2015-ல் சுகன்யாவுக்கு ஆதரவாக ரூ.10,00,500 இழப்பீடு மற்றும் நிரந்தரத் தடை உத்தரவு வழங்கி தீர்ப்பளித்தது. இந்த தீர்ப்பை எதிர்த்து சன் டிவி மேல்முறையீடு செய்தது. ஆனால், கீழ் நீதிமன்றத்தின் கண்டுபிடிப்பில் எந்தத் தவறும் இல்லை என்றும், அவதூறான கூற்றுகளால் நற்பெயர் இழப்பு ஏற்படுவது இயல்பானது என்றும் கூறி, சென்னை உயர் நீதிமன்றம் சன் டிவியின் மேல்முறையீட்டை தள்ளுபடி செய்து, சிவில் நீதிமன்றத்தின் தீர்ப்பை உறுதி செய்துள்ளது.
