ஆப்கானிஸ்தானுக்கு எதிரான டெஸ்ட் போட்டியில் இந்திய அணிக்காக அறிமுகமான இளம் வீரர் மானவ் சுதர், தனது முதல் ஓவரிலேயே விக்கெட் வீழ்த்தி அனைவரது கவனத்தையும் ஈர்த்துள்ளார். சண்டிகரின் முல்லன்பூரில் நடைபெற்ற இந்தப் போட்டியின் இரண்டாம் நாள் ஆட்டத்தில், ஆப்கானிஸ்தான் அணி தனது முதல் இன்னிங்ஸை விளையாடியது.
ஆப்கானிஸ்தான் தொடக்க வீரர்களைக் கட்டுப்படுத்த கேப்டன் சுப்மன் கில், அறிமுக வீரர் மானவ் சுதரை பந்துவீச அழைத்தார். தனது டெஸ்ட் வாழ்க்கையின் முதல் ஓவரிலேயே, அதன் 4-வது பந்தில் ஆப்கானிஸ்தான் தொடக்க வீரர் அப்துல் மாலிக் விக்கெட் ஆனார். சுதரின் பந்தை ஸ்வீப் செய்ய முயன்ற மாலிக், பந்து பேட்டின் மேல் விளிம்பில் பட்டு மேலே எழும்ப, டீப் ஸ்கொயர் லெக் திசையில் ஓடி வந்த முகமது சிராஜ் அற்புதமாக கேட்ச் பிடித்தார்.
ராஜஸ்தானைச் சேர்ந்த 23 வயதான மானவ் சுதர், இடது கை சுழற்பந்து வீச்சாளர் ஆவார். உள்ளூர் போட்டிகளில் சிறப்பான ஆட்டத்தை வெளிப்படுத்தியதன் மூலம் இந்திய அணியில் வாய்ப்பு பெற்றார். முதல்தர கிரிக்கெட்டில் 29 போட்டிகளில் 129 விக்கெட்டுகளையும், பேட்டிங்கில் ஒரு சதம் உட்பட 945 ரன்களையும் எடுத்துள்ளார். லிஸ்ட் ஏ 50 ஓவர் கிரிக்கெட்டில் 25 போட்டிகளில் 34 விக்கெட்டுகளும், 29 டி20 போட்டிகளில் 25 விக்கெட்டுகளும் வீழ்த்தியுள்ளார்.
2022-23 ரஞ்சி கோப்பை தொடரில் ராஜஸ்தான் அணிக்காக 6 போட்டிகளில் 39 விக்கெட்டுகளை வீழ்த்தி அனைவரது கவனத்தையும் ஈர்த்தார். ரவீந்திர ஜடேஜாவிற்குப் பிறகு இந்திய அணியின் சிறந்த சுழற்பந்து வீச்சு ஆல்-ரவுண்டராக இவர் உருவெடுப்பார் என எதிர்பார்க்கப்படுகிறது.
