ஐபிஎல் 2027 மினி ஏலத்திற்கு முன்னதாக, மும்பை இந்தியன்ஸ் அணியில் இருந்து ஆல்ரவுண்டர் ஹர்திக் பாண்டியாவை வர்த்தக முறையில் ஒப்பந்தம் செய்வதில் சென்னை சூப்பர் கிங்ஸ் அணி தீவிர ஆர்வம் காட்டி வருகிறது. இந்த பரபரப்பான சூழலில், ஹர்திக்கைப் பெறுவதற்கு சிஎஸ்கே எந்த வீரர்களை விட்டுக் கொடுக்க வேண்டும் என்பது குறித்து முன்னாள் வீரர் ரவிச்சந்திரன் அஸ்வின் தனது யூடியூப் சேனலில் முக்கிய தகவல்களைப் பகிர்ந்துள்ளார்.
ஹர்திக் பாண்டியாவை வாங்குவதற்காக சிஎஸ்கே அணி ஆல்ரவுண்டர் சிவம் துபேவை தர முன்வரலாம் எனக் கூறப்படும் நிலையில், அது மட்டும் போதாது என அஸ்வின் திட்டவட்டமாகக் கூறியுள்ளார். மும்பை இந்தியன்ஸ் அணி நிர்வாகம் வெறும் சிவம் துபேவை மட்டும் வாங்கிக் கொண்டு ஹர்திக் பாண்டியாவை விட்டுக்கொடுக்க நிச்சயம் சம்மதிக்காது என்றும், துபேவுடன் சேர்த்து ஆயுஷ் மத்ரேவையும் மும்பை அணி உறுதியாகக் கேட்கும் என்றும், மத்ரே இல்லாமல் இந்த வர்த்தகம் அடுத்த கட்டத்திற்கு நகராது என்றும் அவர் குறிப்பிட்டுள்ளார்.
மேலும், சிஎஸ்கே அணிக்கு இருக்கும் மாற்று வழிகளையும் அஸ்வின் பட்டியலிட்டார். ஒருவேளை ஆயுஷ் மத்ரேவை தர சிஎஸ்கே மறுத்தால், அதற்குப் பதிலாக சிவம் துபேவுடன் சேர்த்து வேகப்பந்து வீச்சாளர் நாதன் எல்லிஸை தரலாம் என்றும் அவர் பரிந்துரைத்துள்ளார். எல்லிஸ் அணிக்கு வந்தால், பும்ராவுடன் இணைந்து டெத் ஓவர்களில் பந்துவீச மும்பைக்குப் பலம் கிடைக்கும் என்றும் அஸ்வின் கூறியுள்ளார்.
அதற்கும் மும்பை இந்தியன்ஸ் அணி ஒப்புக்கொள்ளவில்லை என்றால், சிவம் துபே, நாதன் எல்லிஸ் ஆகியோருடன் விக்கெட் கீப்பர் பேட்டர் உர்வில் படேலையும் சேர்த்து மூன்று வீரர்களை சிஎஸ்கே வழங்கலாம் என்றும் அஸ்வின் ஆலோசனை வழங்கியுள்ளார். இதன் மூலம் மும்பை இந்தியன்ஸ் அணிக்கு ஒரு விக்கெட் கீப்பரும் கிடைப்பார் என்றும், மும்பை இந்தியன்ஸ் அணி நிர்வாகத்தால் மறுக்கவே முடியாத அளவிற்கு வலுவான சலுகையை சிஎஸ்கே கொடுக்க வேண்டும் என்றும் அவர் வலியுறுத்தியுள்ளார்.
இரு அணிகளுக்கும் இடையில் பல வீரர்களை உள்ளடக்கிய ஒரு மெகா வர்த்தகம் நடக்கலாம் என்றும் அஸ்வின் கணித்துள்ளார். சிஎஸ்கே அணி துபே, எல்லிஸ், உர்வில் மற்றும் மற்றொரு வேகப்பந்து வீச்சாளரை வழங்கி, அதற்குப் பதிலாக ஹர்திக் பாண்டியாவுடன் சேர்த்து, தங்களது முன்னாள் வீரரான தீபக் சாஹரையும் திரும்பப் பெறலாம் என்றும் அவர் கூறியுள்ளார்.
இதன் மூலம் சென்னை சூப்பர் கிங்ஸ் அணிக்கு ஒரு புதிய பந்து வீச்சாளரும், பழைய அனுபவமும் கிடைக்கும் என்று அஸ்வின் நம்பிக்கை தெரிவித்துள்ளார். ஐபிஎல் 2027 தக்கவைப்புப் பட்டியலை வெளியிட நவம்பர் 15 கடைசி நாளாக உள்ள நிலையில், இந்த வர்த்தகப் பேச்சுவார்த்தை ரசிகர்களிடையே மிகுந்த ஆவலைத் தூண்டியுள்ளது.
முன்னதாக, 'அபிஷேக் சர்மா, வைபவ் சூர்யவன்ஷி, இஷான் கிஷனுக்கு அநீதி இழைக்கிறார்கள்' என யுவராஜ் சிங் ஆதங்கம் தெரிவித்ததும் குறிப்பிடத்தக்கது. மேலும், இந்தியாவை வீழ்த்தி விட்டோம் என மார்தட்டிய பாகிஸ்தான் பிரதமர் ஷெபாஸ் ஷெரீப்பை நெட்டிசன்கள் கழுவி ஊற்றியதும் செய்தியாகியுள்ளது.
