திருச்சி, புதுக்கோட்டை மாவட்ட எல்லையில் உள்ள தொண்டைமாநல்லூர் பகுதியை சேர்ந்த சேட்டு மற்றும் கலைச்செல்வி தம்பதியினரின் 19 வயது மகள் சீதாலட்சுமி, திருச்சி மகாத்மா காந்தி நினைவு அரசு மருத்துவமனையில் மூன்றாம் ஆண்டு செவிலியர் படிப்பு படித்து வந்தார். அவருக்கு மூக்கில் சதை வளர்ச்சி ஏற்பட்டதாகக் கூறி மருத்துவமனையில் அனுமதிக்கப்பட்டார். மருத்துவர்கள் உடனடியாக அறுவை சிகிச்சை செய்ய வேண்டும் என்று கூறியுள்ளனர்.
மருத்துவமனை மருத்துவர்கள் சீதாலட்சுமிக்கு நேற்று அறுவை சிகிச்சை மேற்கொண்டனர். அப்போது, அதிக அளவில் மயக்க மருந்து கொடுக்கப்பட்டதன் காரணமாக அவர் உயிரிழந்ததாகக் கூறப்படுகிறது. இந்த துயரச் சம்பவத்தால், சீதாலட்சுமியின் உறவினர்கள் மற்றும் சக செவிலியர் மாணவிகள் கடும் அதிர்ச்சி அடைந்தனர்.
மருத்துவர்களின் தவறான சிகிச்சையே சீதாலட்சுமியின் மரணத்திற்கு காரணம் என்று குற்றம் சாட்டி, மாணவியின் பெற்றோர் மற்றும் சக மாணவிகள் திருச்சி அரசு தலைமை மருத்துவமனை முன்பு திடீரென சாலை மறியலில் ஈடுபட்டனர். இதனால் அப்பகுதியில் பெரும் பரபரப்பு ஏற்பட்டது. இந்த திடீர் சாலை மறியல் போராட்டத்தால் போக்குவரத்து பாதிக்கப்பட்டது.
சக மாணவியின் மரணத்திற்கு நீதி கேட்டு நடத்தப்பட்ட இந்த போராட்டம், மருத்துவமனையின் நிர்வாகத்திற்கும் மருத்துவர்களுக்கும் பெரும் அழுத்தத்தை ஏற்படுத்தியுள்ளது. உரிய விசாரணை நடத்தி, தவறிழைத்தவர்கள் மீது நடவடிக்கை எடுக்க வேண்டும் என போராட்டக்காரர்கள் வலியுறுத்தியுள்ளனர். இந்த சம்பவம் மருத்துவத் துறையில் ஒரு பெரும் சோகத்தை ஏற்படுத்தியுள்ளது.
