வீடுகளில் கரப்பான் பூச்சிகளின் தொல்லை தொடர்ந்து அதிகரித்து வருவது பலருக்கும் பெரும் பிரச்சனையாக உள்ளது. குறிப்பாக, இரவு நேரங்களில் இவற்றின் நடமாட்டம் அதிகமாக காணப்படுகிறது. இதற்கான காரணத்தை லைஃப்ஸ்டைல். என்ற இணையதளம் விளக்கியுள்ளது.
கரப்பான் பூச்சிகள் பொதுவாக இரவில் நடமாடக்கூடியவை. பகல் நேரங்களில் அவை மறைவான, இருண்ட மற்றும் ஈரப்பதமான இடங்களில் தங்கியிருக்கும். சமையலறை அலமாரிகள், சிங்க் அடியில், சுவர்களின் இடுக்குகள், குழாய்களுக்குப் பின்னால் மற்றும் மரச்சாமான்களுக்கு அடியில் உள்ள இருண்ட பகுதிகளில் இவை தஞ்சம் புகும்.
கரப்பான் பூச்சிகள் வெப்பத்தை விரும்புவதோடு, ஈரப்பதமான சூழலிலும் செழித்து வளரும். எனவே, சமையலறைகள், குளியலறைகள் போன்ற ஈரப்பதம் நிறைந்த பகுதிகள் இவற்றுக்கு மிகவும் உகந்த இடங்களாகும். இரவு நேரத்தில் மனிதர்களின் நடமாட்டம் குறையும் போது, உணவு தேடுவதற்காக இவை வெளிவரும்.
சமையலறையில் உள்ள உணவுத் துகள்கள், குப்பைகள் மற்றும் பிற கழிவுகள் கரப்பான் பூச்சிகளுக்கு முக்கிய உணவாக அமைகின்றன. இரவு நேரத்தில் மனிதர்கள் உறங்கச் சென்ற பிறகு, இந்த உணவு ஆதாரங்களைத் தேடி இவை வெளிவருவதால், அவற்றின் நடமாட்டம் இரவில் அதிகமாக காணப்படுகிறது.
இயற்கையான மற்றும் வீட்டு அடிப்படையிலான முறைகளைப் பின்பற்றியும் கரப்பான் பூச்சிகளின் எண்ணிக்கை தொடர்ந்து அதிகரித்தால், பிரச்சினை சுவர் இடுக்குகள், குழாய்களுக்குப் பின்னால் அல்லது சமையலறையின் அணுக முடியாத பகுதிகளில் இருக்கக்கூடும். இந்தப் பகுதிகளில் பூச்சிகள் பெருகுவதற்கான சாத்தியக்கூறுகள் அதிகம்.
எனவே, கரப்பான் பூச்சிகளின் தொல்லையை கட்டுப்படுத்த, வீட்டை சுத்தமாக வைத்திருப்பதுடன், உணவுப் பொருட்களை முறையாக சேமித்து வைப்பதும், குப்பைகளை உடனுக்குடன் அகற்றுவதும் அவசியம். மேலும், பூச்சிகள் மறைந்திருக்க வாய்ப்புள்ள இடங்களை கண்டறிந்து, அவற்றை அடைப்பதன் மூலம் அவற்றின் எண்ணிக்கையை கட்டுப்படுத்தலாம்.
