இந்திய கிரிக்கெட் அணியின் முன்னாள் வீரர் வினோத் காம்ப்ளியின் தற்போதைய உடல்நிலை குறித்து சமூக வலைதளங்களில் பரவி வரும் வீடியோக்கள் அவரது ரசிகர்களிடையே பெரும் அதிர்ச்சியையும் கவலையையும் ஏற்படுத்தியுள்ளது. தானேவில் உள்ள ஒரு முதியோர் பராமரிப்பு மையத்தில் அவர் இருப்பதாகவும், அங்கு சிகிச்சை பெற்று வருவதாகவும் தகவல்கள் வெளியாகியுள்ளன.
சமூக வலைதளங்களில் வைரலாகி வரும் வீடியோவில், வினோத் காம்ப்ளி தனது உடல்நிலை குறித்து பேசியுள்ளார். அவர் தற்போது சிகிச்சை பெற்று வருவதாகவும், முதியோர் இல்லத்தில் உள்ள வசதிகள் சிறப்பாக இருப்பதாகவும், அங்கு தனக்கு மிகுந்த அன்பும் மரியாதையும் கிடைப்பதாகவும் கூறியுள்ளார். இருப்பினும், அவர் நிரந்தரமாக அங்கு தங்கியிருக்கிறாரா என்பது உறுதிப்படுத்தப்படவில்லை.
தற்போது, அவர் தானேவில் உள்ள முதியோர் பராமரிப்பு மையத்தில் சிகிச்சை மற்றும் பராமரிப்பில் இருப்பதாகவே தகவல்கள் தெரிவிக்கின்றன. கடந்த சில ஆண்டுகளாக வினோத் காம்ப்ளி உடல்நலப் பிரச்சினைகளை சந்தித்து வருகிறார். குறிப்பாக, 2024 ஆம் ஆண்டு டிசம்பர் மாதம் சிறுநீரகப் பாதை தொற்று உள்ளிட்ட உடல்நலக் குறைபாடுகளுக்காக அவர் மருத்துவமனையில் அனுமதிக்கப்பட்டிருந்தார்.
வினோத் காம்ப்ளியின் உடல்நிலை குறித்து அவரது நண்பரும், முன்னாள் முதல்தர நடுவருமான மார்கஸ் கவுட்டோ சில தகவல்களை வெளியிட்டிருந்தார். காம்ப்ளியின் மூளையில் ரத்தக்கட்டி இருந்ததாகவும், அதன் காரணமாக அவருக்கு நினைவாற்றல் தொடர்பான பிரச்சினைகள் ஏற்பட்டதாகவும் அவர் தெரிவித்திருந்தார்.
இந்த நிலையில், அவர் பராமரிப்பு மையத்தில் இருந்து வெளியிட்ட புதிய வீடியோவில், பேசுவதற்கு சிரமப்படுவது போன்ற காட்சிகள் காணப்படுவதாக ரசிகர்கள் கவலை தெரிவித்துள்ளனர். இது அவரது உடல்நிலை மேலும் மோசமடைந்துள்ளதோ என்ற அச்சத்தை ஏற்படுத்தியுள்ளது.
இந்திய அணிக்காக 17 டெஸ்ட் போட்டிகளில் விளையாடியுள்ள வினோத் காம்ப்ளி, மொத்தம் 1,084 ரன்கள் குவித்துள்ளார். மேலும், 104 ஒருநாள் போட்டிகளில் விளையாடி 2,477 ரன்கள் எடுத்துள்ளார். அவரது சிறப்பான ஆட்டம் பல ரசிகர்களால் இன்றும் நினைவுகூரப்படுகிறது.
முன்னாள் கிரிக்கெட் வீரரின் தற்போதைய நிலைமை குறித்த செய்திகள், விளையாட்டு ரசிகர்கள் மத்தியில் சோகத்தை ஏற்படுத்தியுள்ளது. அவரது உடல்நிலை விரைவில் சீரடைய வேண்டும் என பலரும் சமூக வலைதளங்களில் பதிவிட்டு வருகின்றனர்.
