கடந்த இரு மாதங்களில் அரிசி விலைகள் கிலோவுக்கு ரூ.17 முதல் ரூ.40 வரை கடுமையாக உயர்ந்துள்ள நிலையில், ஏழை மற்றும் நடுத்தர மக்கள் பெரும் சிரமத்திற்கு ஆளாகியுள்ளனர். இந்த விலை உயர்வை சமாளிக்க அரசு உரிய நடவடிக்கை எடுக்காதது ஏமாற்றத்தை அளிப்பதாக பாட்டாளி மக்கள் கட்சி (பாமக) தலைவர் அன்புமணி ராமதாஸ் தெரிவித்துள்ளார்.
இதுகுறித்து அவர் வெளியிட்டுள்ள அறிக்கையில், தமிழ்நாட்டில் அரிசி விலை உயர்வு கடந்த ஜூலை மாதத்திலிருந்தே அதிகரித்து வருவதாகக் குறிப்பிட்டுள்ளார். ஜூலை மாதத்தில் இட்லி அரிசி விலை கிலோவுக்கு ரூ.8 வரையிலும், சன்னரக அரிசி விலை ரூ.15 வரையிலும், சில வகை அரிசி விலை ரூ.30 வரையிலும் உயர்ந்தன. இதுகுறித்து ஜூலை 22 ஆம் தேதி அவர் எச்சரித்தும், மத்திய, மாநில அரசுகள் உரிய நடவடிக்கை எடுக்காததால் விலை கட்டுக்குள் வரவில்லை.
குறிப்பாக, இரு மாதங்களுக்கு முன்பு வரை கிலோ ரூ.50 முதல் ரூ.65 வரை விற்ற மைசூர் பொன்னி, ஆந்திரா பொன்னி போன்ற அரிசி வகைகள் தற்போது ரூ.85 ஆக உயர்ந்துள்ளன. அதி சன்னரக அரிசி விலை ரூ.55 லிருந்து ரூ.75 ஆகி, தற்போது ரூ.90 முதல் ரூ.95 வரை விற்பனையாகிறது. இட்லி அரிசி விலை ரூ.43 லிருந்து ரூ.60 ஆகவும், உயர்ரக இட்லி அரிசி ரூ.71 வரையிலும் விற்பனை செய்யப்படுகிறது. ஒரு காலத்தில் ரூ.50 ஆக இருந்த இட்லி அரிசியின் அதிகபட்ச விலை, தற்போது குறைந்தபட்ச விலையாக ரூ.60 ஆக உயர்ந்துள்ளது.
பருவமழை பொய்த்ததால் காவிரி பாசன மாவட்டங்களில் கோடை மற்றும் குறுவை பருவ சாகுபடி குறைந்தது, ஆந்திரா மற்றும் கர்நாடக மாநிலங்களில் வறட்சி காரணமாக நெல் உற்பத்தி குறைந்தது போன்ற காரணங்கள் அரிசி விலை உயர்வுக்கு கூறப்படுகின்றன. இருப்பினும், கடந்த ஆண்டு மூன்று பருவங்களிலும் நெல் அமோக விளைச்சல் கண்ட நிலையில், இந்த அளவுக்கு விலை உயர்வு செயற்கையானது என்றும், நெல் விளைச்சல் குறையும் என்ற எதிர்பார்ப்பில் விலை உயர்த்தப்பட்டிருக்கலாம் என்றும் அன்புமணி ராமதாஸ் சுட்டிக்காட்டியுள்ளார்.
அரிசி மட்டுமின்றி, பருப்பு வகைகள், சர்க்கரை, வெங்காயம் மற்றும் காய்கறிகளின் விலைகளும் கடுமையாக உயர்ந்துள்ளதால் மக்கள் பாதிக்கப்பட்டுள்ளனர். இதன் தாக்கத்தைக் குறைக்க மத்திய, மாநில அரசுகள் நடவடிக்கை எடுக்க வேண்டும். அரிசி ஏற்றுமதிக்கு தடை விதித்தல், மொத்த வணிகர்களின் கையிருப்புக்கு உச்சவரம்பு நிர்ணயித்தல் போன்ற நடவடிக்கைகளால் உள்நாட்டு சந்தையில் அரிசி புழக்கத்தை அதிகரிக்க மத்திய அரசு முன்வர வேண்டும்.
அண்டை மாநிலமான ஆந்திர அரசு, வெளிச்சந்தையில் அரிசி விலையைக் கட்டுப்படுத்த ரயத்து பசார் எனப்படும் உழவர் சந்தைகளில் அரிசி விற்பனைக்கு தனிப்பிரிவு தொடங்கியுள்ளது. அங்கு சம்பா மசூரி, சோனா மசூரி அரிசி ரகங்கள் கிலோ ரூ.50க்கும், வெங்காயம் கிலோ ரூ.35க்கும் விற்கப்படுகிறது. இதனால் அம்மாநில மக்கள் பயனடைந்து வருகின்றனர்.
ஆனால், தமிழ்நாட்டில் சன்னரக அரிசி, வெங்காயம் விலையைக் குறைக்க எந்த நடவடிக்கையும் எடுக்கப்படவில்லை. நியாயவிலைக் கடைகளில் வெங்காயம் கிலோ ரூ.35க்கு விற்பனை செய்யப்படும் என அறிவித்த தமிழக அரசு, குறைந்த அளவிலேயே வெங்காயம் வழங்கியதால் ஒரு மணி நேரத்தில் விற்றுத் தீர்ந்துவிட்டது. வெளிச்சந்தையில் அரிசி விலையைக் கட்டுப்படுத்தவும் ஆக்கப்பூர்வமான நடவடிக்கை இல்லை.
எனவே, ஆந்திர மாநில அரசைப் பின்பற்றி, தமிழ்நாட்டிலும் இலவசமாக வழங்கப்படும் அரிசி தவிர, சன்னரக அரிசியை கிலோ ரூ.50 என்ற விலையில் நியாயவிலைக் கடைகள் மூலம் விற்பனை செய்ய நடவடிக்கை எடுக்க வேண்டும். தமிழ்நாட்டில் உள்ள அரிசி ஆலைகள் மற்றும் மொத்த வணிகர்களிடம் உள்ள அரிசியில் 20 சதவீதத்தை அடக்க விலைக்கு கொள்முதல் செய்து இந்தத் திட்டத்தை செயல்படுத்த வேண்டும் என அன்புமணி ராமதாஸ் வலியுறுத்தியுள்ளார்.
