சென்னை சைபர் கிரைம், ஜெம் வீரமணி வழக்கில் போக்சோ சட்டத்தை மீறியதாக 100க்கும் மேற்பட்ட சமூக வலைதளங்கள் மற்றும் இணையதள பக்கங்களுக்கு எச்சரிக்கை விடுத்துள்ளது. 'ஜெம் கிரானைட்ஸ்' நிறுவனத்தின் ஆர்.வீரமணி, எளிய குடும்பங்களைச் சேர்ந்த மற்றும் ஆதரவற்ற 100க்கும் மேற்பட்ட சிறுமிகளுக்கு எதிராக பாலியல் அத்துமீறல்களில் ஈடுபட்டதாக வெளியான செய்திகள் பெரும் அதிர்ச்சியை ஏற்படுத்தியுள்ளன. இந்த பாலியல் வன்கொடுமை வழக்கை விசாரிக்க தமிழக அரசு ஒரு சிறப்பு புலனாய்வு குழுவை (SIT) அமைத்துள்ளது. தற்போது கைது செய்யப்பட்டுள்ள ஜெம் வீரமணி, புழல் சிறையில் அடைக்கப்பட்டுள்ளார். அவருக்கு உடந்தையாக இருந்ததாக சாந்தி என்ற பெண் மற்றும் அவரது கணவர் மகேந்திர சிம்கன் ஆகியோரும் கைது செய்யப்பட்டுள்ளனர். மேலும், ஜெம் வீரமணியின் உதவியாளர் கணேசன் உட்பட இதுவரை நான்கு பேர் இந்த வழக்கில் கைது செய்யப்பட்டுள்ளனர். இந்த நிலையில், போக்சோ சட்ட விதிமீறல்களில் ஈடுபட்டதாகக் கூறி, 100க்கும் மேற்பட்ட சமூக வலைதள மற்றும் இணையதள பக்கங்களுக்கு சைபர் கிரைம் எச்சரிக்கை விடுத்துள்ளது. சிறப்பு புலனாய்வு குழுவின் உத்தரவின் பேரில் சைபர் கிரைம் இந்த நடவடிக்கையை எடுத்துள்ளது. போக்சோ வழக்கு தொடர்பான பதிவுகளை சமூக வலைதளங்களில் உடனடியாக நீக்குமாறு சைபர் கிரைம் போலீஸ் எச்சரிக்கை விடுத்துள்ளது. இதுவரை பதிவுகளை நீக்காத 40க்கும் மேற்பட்ட சமூக வலைதள மற்றும் இணையதள பக்கங்கள் மீது சைபர் கிரைம் போலீஸ் வழக்குப்பதிவு செய்து நடவடிக்கை எடுத்துள்ளது. இந்த வழக்கு தொடர்பான ஆதாரங்களை பொதுவெளியில் பகிரவோ அல்லது விவாதிக்கவோ கூடாது என நீதிமன்றம் ஏற்கனவே உத்தரவிட்டிருந்தது குறிப்பிடத்தக்கது.
