நவக்கிரகங்களில் சுபகிரகமான குரு பகவான், இதுவரை மிதுன ராசியில் சஞ்சரித்து வந்தார். வரும் மே 26, 2026 அன்று, வாக்கியப் பஞ்சாங்கத்தின்படி பகல் 11.08 மணியளவில், புனர்பூசம் நட்சத்திரத்தின் 4-ஆம் பாதத்தில் கடக ராசிக்கு பெயர்ச்சி அடைகிறார். இந்த பெயர்ச்சியின்போது, குரு பகவான் உச்சம் பெற்று சஞ்சரிப்பார். இது பல ராசிக்காரர்களுக்கு நற்பலன்களை அள்ளித் தரும்.
'குரு பார்க்க கோடி நன்மை' என்பது ஜோதிட சாஸ்திரத்தில் கூறப்பட்டுள்ளது. அதன்படி, உச்சம் பெறும் குருவின் பார்வை விருச்சிகம், மகரம், மீனம் ஆகிய ராசிகளில் பதிவதால், அந்த ராசிக்காரர்களுக்கு தொட்டது துலங்கும். தொழில் முன்னேற்றம், வருமான உயர்வு, வளர்ச்சி என அனைத்தும் கூடும். நாட்டிலும், வீட்டிலும் நல்லது நடக்கும். ஆன்மிகம் தழைக்கும். சுபநிகழ்ச்சிகள், குடமுழுக்கு விழாக்கள், ஆலயத் திருப்பணிகள் ஆகியவை சிறப்பாக நடைபெறும்.
இந்த குரு பெயர்ச்சிக்குப் பிறகு, குரு பகவான் அக்டோபர் 20, 2026 அன்று சிம்ம ராசிக்கு அதிசாரமாகச் செல்கிறார். பின்னர் பிப்ரவரி 13, 2027 முதல் மீண்டும் கடக ராசிக்கு வந்து தனது பயணத்தைத் தொடர்கிறார். மேலும், நவம்பர் 13, 2026 அன்று ராகு-கேது பெயர்ச்சியும் நிகழ உள்ளது. மகர ராகுவும், கடக கேதுவும் வாழ்க்கையில் மாற்றங்களையும், ஏற்றங்களையும் தரப்போகிறார்கள். இடையில் குரு வக்ரமும் பெறுகிறார். கடக ராசிக்கு ஜென்ம குருவாகவும், மேஷத்திற்கு அர்த்தாஷ்டம குருவாகவும், தனுசுவிற்கு அஷ்டமத்து குருவாகவும், சிம்மத்திற்கு விரய குருவாகவும், கும்பத்திற்கு ரோக குருவாகவும் குரு பகவான் சஞ்சரிப்பார். எனவே, மேற்கண்ட ராசிக்காரர்கள் தங்கள் சுய ஜாதக அடிப்படையில் திசாபுத்தி பலங்களை அறிந்து, அதற்குரிய ஆலயங்களில் வழிபட்டு யோக பலத்தைப் பெறலாம்.
இந்த குரு பெயர்ச்சியின் விளைவாக நாட்டில் நல்ல நிகழ்வுகள் பலவும் நடைபெறும். உச்சம் பெற்ற குருவின் அருளால், மக்கள் அச்சமின்றி வாழ அரசாங்கம் வழிவகுக்கும். தங்கம், வெள்ளி விலைகள் உயரும். பெட்ரோல், டீசல், எரிவாயு விலைகளில் ஏற்ற இறக்கங்கள் காணப்படும். விளையாட்டு, விஞ்ஞானம், மருத்துவம், கலை, ஜோதிடம், ஆன்மிகம், பத்திரிகை, ஊடகம், கணினித் துறைகள் அபரிமிதமான வளர்ச்சியை அடையும். மழைவளம் சிறப்பாக இருக்கும். செவ்வாய்-சனி சேர்க்கை மற்றும் பார்வைக் காலங்களில் இயற்கை சீற்றங்கள், அரசியல் கொந்தளிப்புகள் ஏற்படலாம். சிம்மத்தில் குரு சஞ்சரிக்கும்போது அரசியல் களத்தில் சிறு சிறு பிரச்சனைகள், உட்கட்சிப் பூசல்கள் ஏற்படலாம். அரசியல் களத்தில் உள்ள பெண்களுக்கு முக்கியத்துவம் கூடும். இளம் கலைஞர்கள் பலர் புகழ் பெறுவார்கள். திருக்கணித பஞ்சாங்கத்தின்படி, இந்த குரு பெயர்ச்சி ஜூன் 2, 2026 அன்று நடைபெறும்.
