தமிழ்நாட்டில் தனியார் பால் விலைகள் இன்று முதல் லிட்டருக்கு ரூ.4 வரை உயர்த்தப்பட்டுள்ள நிலையில், ஏழை மற்றும் நடுத்தர மக்கள் பயன்படுத்தும் பால் விலையை தனியார் நிறுவனங்கள் மனசாட்சியின்றி மேலும் உயர்த்தி வருவது கண்டிக்கத்தக்கது என பா.ம.க. தலைவர் அன்புமணி ராமதாஸ் தெரிவித்துள்ளார்.
தனியார் பால் நிறுவனங்கள், 3 சதவீத கொழுப்பு சத்து கொண்ட நீல உறை பாலின் விலையை அரை லிட்டருக்கு ரூ.31-ல் இருந்து ரூ.32 ஆகவும், 4.5 சதவீத கொழுப்பு சத்து கொண்ட பச்சை உறை பாலின் விலையை ரூ.35-ல் இருந்து ரூ.37 ஆகவும், 6 சதவீத கொழுப்பு சத்து கொண்ட ஆரஞ்சு உறை பாலின் விலையை ரூ.40-ல் இருந்து ரூ.42 ஆகவும் உயர்த்தியுள்ளன. இது 2026-ஆம் ஆண்டில் தனியார் நிறுவனங்கள் அறிவித்துள்ள மூன்றாம் விலை உயர்வு ஆகும். கடந்த பிப்ரவரி மாதம் முதல் இப்போது வரையிலான 8 மாதங்களில் மட்டும் 3 முறை பால் விலை உயர்த்தப்பட்டுள்ளது. குறிப்பாக, தவெக ஆட்சிக்கு வந்த பின்னர் ஜூலை மற்றும் செப்டம்பர் மாதங்களில் என இரு முறை தனியார் பால் விலைகள் உயர்த்தப்பட்டுள்ளன.
ஆவினில் 3 சதவீத கொழுப்பு சத்துள்ள நீல உறை பால் லிட்டருக்கு ரூ.40-க்கு விற்கப்படும் நிலையில், தனியார் நிறுவனங்கள் ரூ.24 கூடுதலாக ரூ.64-க்கு விற்பனை செய்கின்றன. அதேபோல், பச்சை உறை பால் ஆவினில் ரூ.44-க்கு விற்பனை செய்யப்படும் நிலையில், தனியார் பால் விலை, ரூ.30 கூடுதலாக ரூ.74-க்கு விற்பனை செய்யப்படுகிறது. 6 சதவீத கொழுப்பு சத்து கொண்ட ஆரஞ்சு உறை ஆவின் பாலின் விலை லிட்டருக்கு ரூ.60 மட்டுமே. ஆனால், அதே பாலை தனியார் நிறுவனங்கள் ரூ.84-க்கு விற்பனை செய்கின்றன. இதனால், லிட்டருக்கு ரூ.24 முதல் ரூ.30 வரை வித்தியாசம் காணப்படுகிறது.
தனியார் நிறுவனங்கள் கட்டுப்பாடின்றி பால் விலையை உயர்த்துவதற்கு காரணம், தமிழ்நாட்டின் பால் சந்தையை தனியார் நிறுவனங்கள் தங்கள் கைகளில் வைத்திருப்பதுதான். தமிழ்நாட்டின் பால் சந்தையில் ஆவின் நிறுவனத்தின் பங்கு, 2023-ஆம் ஆண்டு நிலவரப்படி வெறும் 16 சதவீதம் மட்டுமே. தற்போது அது 12 சதவீதம் அளவுக்கு குறைந்திருக்கக் கூடும் என்றும் கூறப்படுகிறது.
இதனால், ஆவின் நிறுவனம் குறைந்த விலையில் பால் விற்பனை செய்தாலும், குறிப்பிட்ட அளவுக்கு மேல் அந்த நிறுவனத்தால் பால் வழங்க முடியாத சூழல் நிலவுகிறது. தனியார் நிறுவனங்கள் 84 சதவீதம் முதல் 88 சதவீதம் சந்தையை தங்களிடம் வைத்திருப்பதால், ஆவின் நிறுவனத்தின் குறைந்த விலை விற்பனையால் பெரிய தாக்கத்தை ஏற்படுத்த முடியவில்லை.
தனியார் நிறுவனங்களுக்கு போட்டியாக, தமிழ்நாட்டில் 50 சதவீதம் சந்தையை கைப்பற்றும் அளவுக்கு ஆவின் நிறுவனத்தை வலுப்படுத்தினால் மட்டுமே தனியார் பால் விலையை கட்டுப்படுத்த முடியும் என அன்புமணி ராமதாஸ் வலியுறுத்தியுள்ளார்.
எனவே, ஆவின் நிறுவனத்திற்கு புத்துயிரூட்டவும், தனியார் பால் விலைகளுக்கு உச்சவரம்பு நிர்ணயித்து அதன் விலையை கட்டுப்படுத்தவும் தமிழக அரசு உடனடியாக நடவடிக்கை எடுக்க வேண்டும் என்றும் அவர் தனது அறிக்கையில் குறிப்பிட்டுள்ளார்.
தனியார் பால் நிறுவனங்களின் தொடர்ச்சியான விலை உயர்வால் பொதுமக்கள் பாதிக்கப்படுவதாகவும், அரசு இதில் தலையிட்டு நியாயமான விலையை உறுதி செய்ய வேண்டும் என்றும் அன்புமணி ராமதாஸ் கோரிக்கை விடுத்துள்ளார்.
