சென்னை சூப்பர் கிங்ஸ் அணியில் பெரும் மாற்றம் நிகழ்ந்துள்ளது. 18 சீசன்களாக அணியை வழிநடத்தி, 5 ஐபிஎல் கோப்பைகளை வென்று தந்த ஸ்டீபன் பிளெமிங்கிற்கு பதிலாக, ஜாகீர் கான் புதிய தலைமைப் பயிற்சியாளராக நியமிக்கப்பட்டுள்ளார். இந்த அதிரடி நடவடிக்கை, சிஎஸ்கே அணியை முற்றிலும் புதுப்பிக்கும் ஒரு திட்டத்தின் பகுதியாகப் பார்க்கப்படுகிறது. இனிவரும் காலங்களில், அணியில் பழைய வீரர்களுக்கு முக்கியத்துவம் குறைந்து, அதிரடி பேட்டிங் மற்றும் வேகப் பந்துவீச்சுத் திறமை கொண்ட வீரர்களுக்கு அதிக வாய்ப்புகள் வழங்கப்படும் என எதிர்பார்க்கப்படுகிறது.
கடந்த மூன்று சீசன்களாக சிஎஸ்கே அணி பிளே-ஆஃப் சுற்றுக்குக்கூட தகுதி பெறாமல் தடுமாறியது. 2024-ல் 5-வது இடத்தையும், 2025-ல் கடைசி இடத்தையும், 2026-ல் 8-வது இடத்தையும் பிடித்தது. தொடக்கத்தில் விக்கெட்டுகளைப் பாதுகாத்து, பின்னர் அதிரடியாக ஆடும் சிஎஸ்கே-வின் பழைய அணுகுமுறை, தற்போது 220 ரன்கள் சாதாரணமாக அடிக்கப்படும் நவீன டி20 கிரிக்கெட்டில் எடுபடவில்லை. 2024 ஐபிஎல் தொடரில் மிகக் குறைந்த ரன் ரேட் கொண்ட அணியாகவும் சிஎஸ்கே பின்தங்கியது.
இந்தத் தேக்க நிலையை உடைத்து, அணியை நவீனப்படுத்தும் நோக்கில், கேப்டன் தோனியின் நேரடிப் பரிந்துரையின் பேரில் ஜாகீர் கான் புதிய தலைமைப் பயிற்சியாளராகப் பொறுப்பேற்றுள்ளார். 'பந்துவீச்சின் சச்சின் டெண்டுல்கர்' என்று தோனியால் புகழப்பட்ட ஜாகீர் கான், புள்ளிவிவரங்களின் அடிப்படையில் துணிச்சலான முடிவுகளை எடுப்பதில் வல்லவர்.
மும்பை இந்தியன்ஸ் அணி 2019 மற்றும் 2020-ல் ஐபிஎல் சாம்பியன் பட்டம் வென்றபோது, ஜாகீர் கான் அந்த அணியின் இயக்குனராகப் பணியாற்றினார். அப்போது, நிர்வாக ரீதியாக ஒரு மிகச் சிறந்த அணியை உருவாக்கியதில் அவருக்கு முக்கியப் பங்கு உண்டு.
ஜாகீர் கானின் வருகை, கலீல் அகமது, முகேஷ் சவுத்ரி, அன்ஷுல் கம்போஜ் போன்ற சிஎஸ்கே அணியில் உள்ள இளம் வேகப்பந்து வீச்சாளர்களுக்கு சிறப்புப் பயிற்சியும், ஆலோசனையும் வழங்க உதவும். இந்திய கிரிக்கெட்டில் வேகப் பந்துவீச்சில் சிறந்து விளங்கிய ஜாகீர் கானின் வழிகாட்டுதல், அவர்களின் கிரிக்கெட் எதிர்காலத்தை மேலும் சிறப்பானதாக மாற்றும்.
முன்னதாக, மும்பை இந்தியன்ஸ் அணிக்காக உள்நாட்டு கிரிக்கெட்டில் சிறந்து விளங்கும் வீரர்களைத் தேர்வு செய்யும் பணியிலும் ஜாகீர் கான் ஈடுபட்டிருந்தார். இதன் மூலம், சிஎஸ்கே அணியில் பழைய வீரர்களை மீண்டும் வாங்கும் வழக்கமான பாணியை மாற்றி, உள்நாட்டுத் தொடர்களில் இருந்து அதிரடி பேட்டிங் மற்றும் திறமை வாய்ந்த வேகப் பந்துவீச்சாளர்களைக் கண்டறிந்து, அணியை வெற்றிப் பாதைக்குத் திருப்புவதே ஜாகீர் கானின் முக்கிய இலக்காக இருக்கும்.
இந்த மாற்றங்கள் மூலம், சிஎஸ்கே அணி மீண்டும் பழைய சிறப்பைப் பெற்று, ஐபிஎல் தொடரில் தனது ஆதிக்கத்தை நிலைநாட்டும் என ரசிகர்கள் ஆவலுடன் எதிர்பார்க்கின்றனர். புதிய பயிற்சியாளரின் கீழ் அணி எவ்வாறு செயல்படும் என்பதைப் பொறுத்திருந்துதான் பார்க்க வேண்டும்.
