மேற்கு ஆசியாவில் நிலவும் பதற்றமான சூழலுக்கு மத்தியில், ஐக்கிய அரபு அமீரகத்தின் (யுஏஇ) பரக்கா அணுமின் நிலையத்தை குறிவைத்து நடத்தப்பட்ட ஆளில்லா விமானத் தாக்குதல் உலகளவில் பெரும் அதிர்ச்சியை ஏற்படுத்தியுள்ளது. வளைகுடா நாடுகளில் செயல்படும் ஒரே அணுமின் நிலையமான பரக்கா, தென் கொரியாவின் தொழில்நுட்ப உதவியுடன் யுஏஇ-யால் கட்டப்பட்டது. 2020-ல் பயன்பாட்டிற்கு வந்த இந்த அணுமின் நிலையம், துபாயை தலைமையிடமாகக் கொண்ட ஏழு எமிரேட்டுகளின் கூட்டமைப்பின் மின்சாரத் தேவையில் கால் பங்கை பூர்த்தி செய்யும் ஆற்றல் கொண்டது.
தாக்குதல் நடத்திய ஆளில்லா விமானம், அணுமின் நிலைய வளாகத்திற்கு அருகில் இருந்த ஒரு ஜெனரேட்டரைத் தாக்கியதில் தீ விபத்து ஏற்பட்டது. இந்தத் தாக்குதலுக்கு இதுவரை எந்தக் குழுவும் பொறுப்பேற்கவில்லை. தாக்குதலின் பின்னணியை கண்டறிய யுஏஇ பாதுகாப்பு அமைச்சகம் தீவிர விசாரணை நடத்தி வருவதாக தெரிவித்துள்ளது.
இந்தச் சம்பவம் குறித்து இந்தியா தனது ஆழ்ந்த கவலையை வெளிப்படுத்தியுள்ளது. இந்திய வெளியுறவு அமைச்சகம் (எம்இஏ) வெளியிட்டுள்ள அறிக்கையில், 'இதுபோன்ற தாக்குதல்கள் ஏற்றுக்கொள்ள முடியாதவை. இது அபாயகரமான பதற்றத்தை அதிகரிக்கும். அனைத்து தரப்பினரும் நிதானத்தைக் கடைப்பிடித்து, உடனடியாக பேச்சுவார்த்தை மற்றும் ராஜதந்திர வழிகளுக்குத் திரும்ப வேண்டும்' என்று வலியுறுத்தியுள்ளது.
மேற்கு ஆசியாவில் தொடர்ந்து பதற்றம் நிலவி வரும் நிலையில், இந்த டிரோன் தாக்குதல் மேலும் அச்சத்தை ஏற்படுத்தியுள்ளது. சர்வதேச சமூகம் இந்த விவகாரத்தில் கவனம் செலுத்தி, அமைதியை நிலைநாட்ட அவசர நடவடிக்கை எடுக்க வேண்டும் என்ற கோரிக்கையும் வலுத்துள்ளது.
