பருவநிலை மாற்றம் காரணமாக, வழக்கமான மழைக்காலங்களுக்கு முன்பாகவே டெங்கு பாதிப்பு அதிகரித்துள்ளதாக தகவல்கள் தெரிவிக்கின்றன. குறிப்பாக, சென்னையில் கடந்த 18 நாட்களில் மட்டும் 614 பேர் டெங்குவால் பாதிக்கப்பட்டுள்ளனர். இது பொதுமக்களிடையே பெரும் அச்சத்தை ஏற்படுத்தியுள்ளது.
அண்ணா பல்கலைக்கழக மெக்கானிக்கல் இன்ஜினியரிங் இறுதியாண்டு மாணவரான ஹரிஷ்குமார் (21), சில நாட்களாக காய்ச்சலால் அவதிப்பட்டு வந்தார். அவரது உடல்நிலை மோசமடைந்ததையடுத்து, கீழ்ப்பாக்கம் அரசு மருத்துவமனையில் அனுமதிக்கப்பட்டார். இருப்பினும், சிகிச்சை பலனின்றி அவர் பரிதாபமாக உயிரிழந்தார். மற்றொரு மாணவரான ஆனந்தராஜ், காய்ச்சல் பாதிப்பு காரணமாக அரசு பொது மருத்துவமனையில் தீவிர சிகிச்சை பெற்று வருகிறார்.
இந்தச் சம்பவங்களைத் தொடர்ந்து, அண்ணா பல்கலைக்கழக வளாகத்தில் மாநகராட்சி ஆணையர் தலைமையில் தீவிர சுகாதாரப் பணிகள் மேற்கொள்ளப்பட்டன. சுமார் 100க்கும் மேற்பட்ட ஊழியர்கள், கொசு மருந்து தெளித்தல் மற்றும் தேவையற்ற குப்பைகளை அகற்றுதல் போன்ற பணிகளில் ஈடுபட்டனர்.
இதுகுறித்து மாநகராட்சி அதிகாரிகள் கூறுகையில், 'உயிரிழந்த ஹரிஷ்குமாருக்கு ஸ்கிரப் டைபஸ் எனப்படும் உண்ணிக் காய்ச்சல் பாதிப்பு ஏற்பட்டுள்ளது. இது தாவரங்களில் வளரும் ஒருவகை உண்ணிப் பூச்சி கடிப்பதால் ஏற்படுகிறது. எனவே, உண்ணிப் பூச்சிகளைக் கட்டுப்படுத்த மருந்து கலந்து செடிகளில் தெளிக்கப்பட்டுள்ளது. பல்கலைக்கழக வளாகம் முழுவதும் சுகாதாரப் பணிகள் தீவிரமாக நடைபெற்று வருகின்றன. காய்ச்சல் மற்றும் உடல்வலி உள்ள மாணவர்களுக்கு பரிசோதனைகள் செய்யப்படுகின்றன' எனத் தெரிவித்தனர்.
அண்ணா பல்கலைக்கழகத்தில் பொது சுகாதாரத் துறை மற்றும் மாநகராட்சி இணைந்து நடத்திய சுகாதார முகாமில், சுமார் 70 மாணவர்கள் காய்ச்சலால் பாதிக்கப்பட்டுள்ளது கண்டறியப்பட்டது. பலர் சுயமாக மருந்துகள் உட்கொண்டதால், இதுகுறித்து அறிவுறுத்தப்பட்டு, தொடர்ந்து கண்காணிப்புப் பணிகள் மேற்கொள்ளப்பட்டு வருகின்றன.
சென்னையில் டெங்கு பாதிப்பு நாளுக்கு நாள் அதிகரித்து வருகிறது. தினசரி 50க்கும் மேற்பட்டோர் டெங்குவால் பாதிக்கப்பட்டு வருகின்றனர். ஆகஸ்ட் மாதத்தில் 605 ஆக இருந்த பாதிப்பு, செப்டம்பர் மாதத்தில் இதுவரை 614 ஆக உயர்ந்துள்ளது. இந்த ஆண்டு இறுதி வரை டெங்கு பாதிப்பு நீடிக்கலாம் என மருத்துவர்கள் எச்சரிக்கை விடுத்துள்ளனர்.
திருவள்ளூர் அரசு மருத்துவக் கல்லூரி மருத்துவமனையில் தினமும் 80க்கும் மேற்பட்டோர் காய்ச்சலுக்காக சிகிச்சைப் பெறுகின்றனர். இன்று மட்டும் 70 பேர் வந்த நிலையில், மூன்று பேருக்கு டெங்கு பாதிப்பு உறுதி செய்யப்பட்டுள்ளது. காஞ்சிபுரம் மாவட்டத்தில் இதுவரை 95 பேர் டெங்குவால் பாதிக்கப்பட்டுள்ளனர். செங்கல்பட்டு மாவட்டத்தில் 177 பேர் டெங்குவால் பாதிக்கப்பட்டுள்ளனர். திருப்போரூர், காட்டாங்கொளத்தூர் பகுதிகளில் காய்ச்சல் பாதிப்பு அதிகரித்துள்ளது. இப்பகுதிகளில் கொசுக்களைக் கட்டுப்படுத்த 950 பணியாளர்கள் ஈடுபட்டு வருகின்றனர். எட்டு நடமாடும் மருத்துவக் குழுக்கள் மூலம் காய்ச்சலுக்கு சிகிச்சை அளிக்கப்பட்டு வருகிறது.
