பட்டினப்பாக்கத்தில் புதிய தலைமைச் செயலகம் அமைக்கும் ஆளும் த.வெ.க. அரசின் தன்னிச்சையான முடிவுக்கு திமுக தலைவர் மு.க.ஸ்டாலின் கடும் கண்டனம் தெரிவித்துள்ளார். இந்த விவகாரத்தில் ஆயிரக்கணக்கான மீனவர்களின் வாழ்வாதாரம் அழிக்கப்படுவதை ஏற்றுக்கொள்ள முடியாது என்றும், மீனவ மக்களின் போராட்டங்களுக்கு திமுக முழு ஆதரவு அளிக்கும் என்றும் அவர் எச்சரித்துள்ளார்.
சென்னை அண்ணா அறிவாலயத்தில் இன்று மீனவ சங்கப் பிரதிநிதிகளைச் சந்தித்த மு.க.ஸ்டாலின், த.வெ.க. அரசின் இந்த முடிவுக்கு எதிராக திமுக உறுதியாக நிற்கும் என்று தெரிவித்தார். மீனவர்களின் வாழ்விடத்தையும் வாழ்வாதாரத்தையும் அழிக்கும் இந்தத் திட்டத்தைக் கைவிடும் வரை, மீனவ சகோதரர்களுடன் திமுக துணை நிற்கும் என்றும் அவர் கூறினார்.
தலைமைச் செயலகம் கட்டுவதற்கு ஓமந்தூரார் அரசினர் தோட்ட வளாகம் போன்ற மாற்று இடங்கள் இருப்பதை சுட்டிக்காட்டிய ஸ்டாலின், ஏற்கெனவே தலைவர் கலைஞரால் கட்டப்பட்ட அந்த வளாகத்தை மருத்துவமனைக்கு பதிலாக தலைமைச் செயலகமாகப் பயன்படுத்தலாம் என்றும் குறிப்பிட்டார். இருப்பினும், கடற்கரையை பார்த்தபடி முதலமைச்சர் அலுவலகம் அமைய வேண்டும் என்ற ஜோதிடரின் ஆலோசனையின் பேரிலேயே பட்டினப்பாக்கம் தேர்ந்தெடுக்கப்பட்டதாக செய்திகள் வருவதாகவும், இது ஒருவரின் ஆசைக்காக ஆயிரக்கணக்கான மீனவர்களின் வாழ்வாதாரத்தை அழிக்கும் செயல் என்றும் அவர் விமர்சித்தார்.
மேலும், தேர்ந்தெடுக்கப்பட்ட இடம் கடுமையான போக்குவரத்து நெரிசல் மிகுந்த பகுதியாகவும், ஏராளமான பள்ளிகள் அமைந்துள்ளதாகவும் ஸ்டாலின் தனது அறிக்கையில் குறிப்பிட்டுள்ளார். இங்கு தலைமைச் செயலகம் அமைந்தால் மாணவர்களும் பொதுமக்களும் பெரும் சிரமத்திற்கு ஆளாக நேரிடும் என்றும் அவர் எச்சரித்தார்.
பட்டினப்பாக்கத்தின் வடக்குப் பகுதியிலும் தெற்குப் பகுதியிலும் மொத்தம் 12 மீனவ கிராமங்கள் மற்றும் குடியிருப்புப் பகுதிகள் ஒரு கிலோ மீட்டருக்குள் அமைந்துள்ளன. முள்ளிக்குப்பம் பஞ்சாயத்து மற்றும் மீனவ மக்களின் கோரிக்கைகளுக்கு அரசு உரிய மரியாதை அளிக்க வேண்டும் என்றும் அவர் வலியுறுத்தினார்.
ஆட்சி அமைய ஆதரவு தந்த இரண்டு கம்யூனிஸ்ட் கட்சிகளே எதிர்ப்பு தெரிவிக்கும் நிலையில், த.வெ.க. அரசு இந்த முடிவில் விடாப்பிடியாக இருப்பது அதிர்ச்சியளிப்பதாகவும், இது திமுகவையும் இந்தப் போராட்டத்தில் இணைய வேண்டிய சூழலை ஏற்படுத்தியுள்ளதாகவும் ஸ்டாலின் கூறினார்.
மீனவர்களின் கண்ணீருக்கு அரசு செவிசாய்த்து, உடனடியாக அரசாணையைத் திரும்பப் பெற வேண்டும் என்றும், பட்டினப்பாக்கத்தில் தலைமைச் செயலகம் அமைக்கும் முடிவைக் கைவிடுவதாக முதலமைச்சர் பகிரங்கமாக அறிவிக்க வேண்டும் என்றும் அவர் கோரிக்கை விடுத்தார். மேலும், அப்பகுதியில் மீனவர்களுக்கான குடியிருப்புகளைக் கட்டித்தர வேண்டும் என்றும் வலியுறுத்தினார்.
அராஜகப் போக்குடனும் ஆணவ எண்ணத்துடனும் பட்டினப்பாக்கத்தில் தலைமைச் செயலகம் கட்டும் பணிகளைத் தொடர்ந்தால், மீனவர்களுடன் இணைந்து திமுக மிகப் பெரிய போராட்டத்தை முன்னெடுக்கும் என மீனவர் விரோத த.வெ.க. அரசினை எச்சரிப்பதாக மு.க.ஸ்டாலின் தனது அறிக்கையில் தெரிவித்துள்ளார்.
