சிறுத்தை கட்சியின் தலைவர் ஒருவருக்கு எதிராக அவரது கட்சியிலேயே முக்கிய தலைவர்கள் சிலர் அதிருப்தியில் இருப்பதாக தகவல்கள் தெரிவிக்கின்றன. தேர்தலில் போட்டியிட வாய்ப்பு வழங்கப்படாதது போன்ற காரணங்களால் அதிருப்தியில் உள்ள இவர்கள், மாற்றுக் கட்சிகளான விசில் கட்சி மற்றும் சூரியக் கட்சியில் இணைய விண்ணப்பித்துள்ளதாக கூறப்படுகிறது.
இந்த தகவலை அறிந்த சிறுத்தை கட்சியின் தலைவர், தனது பழைய கூட்டாளியான விசில் கட்சியின் முக்கிய நிர்வாகியை ஒரு வாரத்திற்கு முன்பே சந்தித்து, 'எங்கள் கட்சி நிர்வாகிகள் யாரையும் உங்கள் கட்சியில் சேர்த்துக்கொள்ள வேண்டாம்' என்று கேட்டுக்கொண்டதாக தெரிகிறது. இதேபோல், சூரியக் கட்சி தரப்பிலும் தனது செல்வாக்கைப் பயன்படுத்தி பேசி வைத்திருப்பதாகவும் கூறப்படுகிறது.
இருப்பினும், இந்த எச்சரிக்கைகளை மீறி, சிறுத்தை கட்சியைச் சேர்ந்த சில முக்கிய பிரபலங்கள் நாளைய தினம் அறிவாலயத்திற்குச் செல்ல திட்டமிட்டுள்ளதாக செய்திகள் வெளியாகியுள்ளன. இதில், குறிப்பாக சிறுத்தை கட்சியின் தொலைக்காட்சி பிரிவின் பொறுப்பில் இருக்கும், பெயரோடு ஊரையும் சேர்த்து அடையாளப்படுத்தப்படும் தலைவர் ஒருவர் இந்த நடவடிக்கையில் முன்னணியில் இருப்பதாக கூறப்படுகிறது.
இதற்கிடையில், சூரியக் கட்சி தரப்பில் கருத்து கேட்பு கூட்டம் ஒன்று நடைபெறுவதாகவும், இது குறித்த அரசியல் நகர்வுகள் உன்னிப்பாக கவனிக்கப்பட்டு வருவதாகவும் தகவல்கள் தெரிவிக்கின்றன.
